Ֆուտբոլի Եվրոպայի առաջնությունում նորամուտը նշած Վրաստանի ազգային հավաքականը պորտուգալացիների նկատմամբ փառահեղ հաղթանակով նվաճեց փլեյ-օֆֆի ուղեգիր։

Եվրո-2024-ի խմբային փուլի վերջին` երրորդ տուրում Վիլի Սանյոլի գլխավորած թիմը 2-0 հաշվով սենսացիոն հաղթանակի հասավ F խմբում առաջին տեղն ապահոված Պորտուգալիայի հավաքականի նկատմամբ։ Դա վրացիների առաջին հաղթանակն էր Եվրոպայի առաջնությունում։

Վրաստանի հավաքականը հաշիվը բացեց արդեն երկրորդ րոպեին. իտալական «Նապոլիի» վինգեր Խվիչա Կվարացխելիան դիպուկ հարվածով եզրափակեց կայծակնային հակագրոհը։

Վրացիները խփած գոլից հետո դիմացան մրցակցի հզոր ճնշմանն ու 57-րդ րոպեին ավստրիական ԼԱՍԿ-ի կիսապաշտպան Օթար Կիտիեշվիլիի ջանքերով վաստակեցին 11-մետրանոց։ Գնդակին մոտեցավ ֆրանսիական «Մեցի» հարձակվող Ժորժ Միկաուտաձեն, որը գրավեց մրցակցի դարպասն ու հաշիվը դարձրեց 2-0։ 23-ամյա ֆուտբոլիստը մրցաշարում խփեց երրորդ գոլն ու միանձնյա գլխավորեց լավագույն ռմբարկուների ցուցակը։ 

Խաղավերջում դարպասի նոր գրավում չարձանագրվեց։ Վրաստանի հավաքականի դարպասապահ Գեորգի Մամարդաշվիլին մի քանի անգամ իր թիմին փրկեց գոլից։

Խմբի մյուս խաղում Թուրքիայի հավաքականը 2-1 հաշվով հաղթեց Չեխիային, որը 20-րդ րոպեից հանդես էր գալիս 10 ֆուտբոլիստով։

Պորտուգալիան 6 միավորով F խմբում գրավեց առաջին տեղը։ Թուրքիան նույնքան միավորով երկրորդն է, իսկ 4 միավոր վաստակած Վրաստանը փլեյ-օֆֆ դուրս եկավ երրորդ տեղով։ Չեխիան 1 միավորով եզրափակեց խումբը և ավարտեց ելույթները։

1/8 եզրափակիչում Պորտուգալիան կխաղա Սլովենիայի հետ, Վրաստանը՝ Իսպանիայի, իսկ Թուրքիան՝ Ավստրիայի։

Եվրո-2024, խմբային փուլ, երրորդ տուր

F խումբ

Վրաստան - Պորտուգալիա` 2-0 (տեսանյութ)

Խվիչա Կվարացխելիա, 2, Ժորժ Միկաուտաձե, 57 (11մ)

Չեխիա - Թուրքիա` 1-2 (տեսանյութ)

Տոմաշ Սոուչեկ, 66 - Հական Չալհանօղլու, 51, Չենք Թոսուն, 90+4

Հեռացում` Անտոնին Բարաք (Չեխիա), 20