Իսպանիայի հավաքականը Գերմանիայից հետո դարձավ Եվրո-2024-ի փլեյ-օֆֆի երկրորդ մասնակիցը:

Լուիս դե լա Ֆուենտեի գլխավորած թիմը B խմբի երկրորդ տուրի խաղում մրցեց Եվրոպայի գործող չեմպիոն Իտալիայի հավաքականի դեմ և հաղթեց 1-0 հաշվով:

Եվրոպայի եռակի չեմպիոններն առաջին խաղակեսում ունեցան մի շարք գոլային պահեր, սակայն Պեդրիի, Ալվարո Մորատայի և Ֆաբիան Ռուիսի հարվածներից հետո իտալացիներին փրկեց հավաքականի ավագ, Ֆրանսիայի չեմպիոն ՊՍԺ-ի դարպասապահ Ջանլուիջի Դոնարուման:

Իսպանացիներն առաջին խաղակեսում գոլ չխփելուց հետո երկրորդ կեսը ևս ակտիվ սկսեցին և 55-րդ րոպեին բացեցին հաշիվը: Բիլբաոյի «Աթլետիկի» եզրային հարձակվող Նիկո Ուիլյամսի՝ ձախ եզրից կատարած փոխանցումից հետո Դոնարուման մատների ծայրով հեռացրեց գնդակը, որը պատահմամբ սեփական դարպասն ուղարկեց իտալական «Բոլոնիայի» պաշտպան Ռիկարդո Կալաֆիորին:

Րոպեներ անց կատալոնական «Բարսելոնայի» եզրային հարձակվող Լամին Յամալը հեռահար հարվածով փորձեց գրավել իտալացիների դարպասը, սակայն գնդակը փոքր շեղությամբ հեռացավ: Քիչ անց էլ Ուիլյամսը, ձախ եզրից մի փոքր կենտրոն տեղափոխվելով կենտրոն հարվածեց, գնդակը դիպավ հորիզոնական դարպասաձողին:

Ավելացված ժամանակում էլ փոխարինման դուրս եկած իսպանական «Բետիսի» հարձակվող Այոսե Պերեսը երկու գոլային պահ ունեցավ, երկու դեպքում էլ Դոնարուման անառիկ պահեց դարպասը:

Իսպանացիները, հաղթելով 1-0 հաշվով, 6 միավորով խմբում ապահովեցին առաջին տեղը: Լուչիանո Սպալետիի գլխավորած հավաքականը երեք միավորով երկրորդն է, Ալբանիան և Խորվաթիան մեկական միավորով բաժանում են 3-4-րդ տեղերը:

Հիշեցնենք, որ այս խմբի երկրորդ տուրի մյուս խաղում Խորվաթիան և Ալբանիան 2-2 հաշիվն էին գրանցել: Առաջին տուրում իսպանացիները 3-0 հաշվով հաղթել էին ԱԱ-2022-ի բրոնզե մեդալակիր խորվաթներին, Իտալիան 2-1 հաշվով առավելության էր հասել Ալբանիայի նկատմամբ:

Իսպանացիները խմբային փուլի վերջին տուրում կհանդիպեն Ալբանիային, Իտալիայի հավաքականն էլ կմրցի Խորվաթիայի դեմ: Երկու խաղերն էլ կկայանան հունիսի 24-ին և կմեկնարկեն Երևանի ժամանակով 23:00-ին:

Եվրո-2024, խմբային փուլ, երկրորդ տուր

B խումբ

Իսպանիա - Իտալիա՝ 1-0 (տեսանյութ)

Ռիկարդո Կալաֆիորի, 55 (ինքնագոլ)