Ֆուտբոլի Անգլիայի հավաքականը դրամատիկ հաղթանակով դուրս եկավ Գերմանիայում շարունակվող Եվրո-2024-ի 1/8 եզրափակիչ։

Փլեյ-օֆֆի մեկնարկում բրիտանական թիմը մեծ դժվարությամբ լրացուցիչ ժամանակում հաղթեց Սլովակիայի հավաքականին. գրանցվեց կամային հաղթանակ՝ 2-1։

Սլովակիայի հավաքականի ֆուտբոլիստները շատ ակտիվ սկսեցին խաղը և արդեն 5-րդ րոպեին կարող էին բացել հաշիվը, սակայն Ռոտերդամի «Ֆեյենորդի» եզրային պաշտպան Դավիդ Հանցկոն վրիպեց նպաստավոր դիրքից։

25-րդ րոպեին Ֆռանչեսկո Կալցոնայի գլխավորած հավաքականը, օգտվելով անգլիացիների պաշտպանությունում առկա բացերից, Պրահայի «Սլավիայի» հարձակվող Իվան Շրանցի ջանքերով առաջ անցավ հաշվի մեջ։

Առաջին խաղակեսում անգլիացիները չստեղծեցին ոչ մի իրական գոլային պահ։

Երկրորդ խաղակեսի մեկնարկում` 50-րդ րոպեին, Անգլիայի հավաքականը գրավեց մրցակցի դարպասը, սակայն «Մանչեսթեր Սիթիի» վինգեր Ֆիլ Ֆոդենի գոլը չեղարկվեց խաղից դուրս իրավիճակի պատճառով։

55-րդ րոպեին Բրատիսլավայի «Սլովանի» հարձակվող Դավիդ Ստրելեցը քիչ մնաց դաշտի կենտրոնից գրավեր անգլիացիների դարպասը, բայց գնդակը մի փոքր շեղությամբ լքեց դաշտի դիմային գիծը։

Գարեթ Սաութգեյթի գլխավորած հավաքականից Հարի Քեյնը 78-րդ րոպեին նպաստավոր դիրքից գլխով շեղ հարվածեց։ 80-րդ րոպեին էլ Լոնդոնի «Արսենալի» կիսապաշտպան Դեկլան Ռայսի հարվածից հետո սլովակներին օգնության եկավ դարպասաձողը։

Անգլիացիներին միայն ավելացված 5-րդ րոպեին հաջողվեց խուսափել պարտությունից. շրջադարձ հարվածով անզուգական գոլի հեղինակ դարձավ Մադրիդի «Ռեալի» կիսապաշտպան Ջուդ Բելինգեմը, որը խաղը տեղափոխվեց լրացուցիչ ժամանակ։

Ավելացված ժամանակի առաջին րոպեին Քեյնն առաջինը կողմնորոշվեց Սլովակիայի հավաքականի տուգանային հրապարակում ստեղծված խառնաշփոթ իրավիճակից ու գրավեց մրցակցի դարպասը` խփելով Անգլիայի հավաքականի հաղթական գոլը։

Եվրոպայի փոխչեմպիոնը դուրս եկավ քառորդ եզրափակիչ, որտեղ մրցելու է Շվեյցարիայի հավաքականի դեմ։

Հիշեցնենք, որ ավելի վաղ քառորդ եզրափակիչ էր դուրս եկել նաև Եվրոպայի առաջնության տանտեր Գերմանիայի հավաքականը։

Եվրո-2024, 1/8 եզրափակիչ

Անգլիա - Սլովակիա` 2-1 (տեսանյութ)

Ջուդ Բելինգեմ, 90+5, Հարի Քեյն, 91 - Իվան Շրանց, 25