Հայաստանի չեմպիոն Երևանի «Փյունիկի» գլխավոր մարզիչ Եղիշե Մելիքյանն ու պաշտպան Տարոն Ոսկանյանը հյուսիսմակեդոնական «Ստրուգայի» դեմ Կոնֆերենցիաների լիգայի որակավորման երկրորդ փուլի պատասխան հանդիպումից առաջ կայացած նախախաղային ասուլիսին պատասխանել են լրագրողների հարցերին:
Տարոն Ոսկանյան․ «Շատ ուրախ եմ, որ վերադարձել եմ «Փյունիկ», փորձում եմ ադապտացվել թիմին և օգնել հաջողությունների հասնել: Վակուլենկոյի բացակայությունը կազդի պաշտպանությունում մեր խաղի վրա: Հուսով եմ՝ տղաներով միասին համախմբված կփակենք այդ բացը: Փորձառու թիմ ենք, առաջին խաղում պարտությունից հետո հոգեբանորեն պատրաստ ենք վաղվա հանդիպմանը»,- ասել է Հայաստանի հավաքականի ֆուտբոլիստը:
Եղիշե Մելիքյան․ «Մրցակիցը մեզ չի զարմացրել առաջին խաղում: Ընդհանրապես մեզ դժվար է զարմացնելը: Զարմացրեց խաղադաշտի շատ վատ որակը, որը հավասարեցրեց թիմերի հնարավորությունները: Մրցակիցն առաջին խաղում հաղթանակի հասավ մեր թույլ տված սխալներից օգտվելու շնորհիվ: Ցուցադրած խաղի համար շատ քննադատությունների ենք ենթարկվել, արժանի էինք դրան: Մեղավոր ենք, երկրպագուն իրավունք ունի գովելու և քնննադատելու: Պետք է այնպիսի խաղ ցուցադրենք, որ արժանանանք գովասանքի:
Ինձ մի փոքր հանգստացնում է այն փաստը, որ «Փյունիկը» հաղթողի հոգեբանություն ունեցող և արդյունք ցույց տվող թիմ է: Մենք սա ապացուցել ենք տարիներով: Այն մակարդակի ենք հասել, որ 1-2 պարտությունն անընդունելի է երկրպագուների համար: Պետք է ամեն ինչ անենք, որպեսզի դուրս գանք որակավորման երրորդ փուլ»,- ասել է Եղիշե Մելիքյանը:
«Փյունիկը» հյուրընկալվելիս 1-2 հաշվով պարտվել էր Հյուսիսային Մակեդոնիայի չեմպիոնին: Պատասխան խաղը տեղի կունենա հուլիսի 30-ին Վազգեն Սարգսյանի անվան «Հանրապետական» ստադիոնում և կմեկնարկի ժամը 20:00-ին:
Հիշեցնենք, որ Հայաստանի 16-ակի չեմպիոնը Չեմպիոնների լիգայի որակավորման առաջին փուլի երկխաղյա դիմակայությունում պարտվել էր (0-0, 0-1) Մինսկի «Դինամոյին» և եվրագավաթային պայքարում տեղափոխվել Կոնֆերենցիաների լիգա:
«Ստրուգայի» արգելքը հաղթահարելու դեպքում «Փյունիկը» Կոնֆերենցիաների լիգայի որակավորման երրորդ փուլում կմրցի «Դիֆերդանժ» (Լյուքսեմբուրգ») - «Օրդաբասի» (Ղազախստան) դիմակայության հաղթողի դեմ։ Առաջին խաղում «Դիֆերդանժը» հաղթել է 1-0 հաշվով։
