Ռեժիսոր և սցենարիստ Էդգար Բաղդասարյանի 2019 թվականի արտադրության «Էրկեն կիշեր» ֆիլմ-տրիպտիխը հայտնվել է ռուսական ազգային «Նիկա» կինոմրցանակաբաշխության նոմինանտների ցանկում, որը հրապարակվել է մրցանակաբաշխության պաշտոնական կայքում: Հայկական ֆիլմը մրցելու է ԱՊՀ, Բալտիայի և Վրաստանի Լավագույն ֆիլմ անվանակարգում: Հայաստանից բացի այս անվանակարգում ներկայացված են «Բոկոտն վազորդը» Ղրղստանից, «Ձերդ գերազանցությունը» Էստոնիայից, «Շունչ արտաշունչը» Վրաստանից և «Պահապանը» Ղազախստանից:
Հիմնական մրցութային ծրագրում ներկայացված են Սերգեյ Դվորցեվոյը «Այկա», Կանտեմիր Բալագովը «Լողլող», Վալերի Տոդորովսկին «Օդեսսա», Անդրեյ Սմիրնովը «Ֆրանսիացի» և Անդրեյ Կոնչալովսկին «Մեղք» ֆիլմերով: Հատկանշական է, որ 2013 թվականից մինչ այսօր Կոնչալովսկին Ռուսական կինոակադեմիայի նախագահն է, իսկ «Նիկա» մրցանակաբաշխությունը հիմնադրել է վերոհիշյալ ակադեմիան՝ 1987 թվականին, առաջին անգամ մրցանակներ բաժանալով 1988-ին՝ Կինեմատոգրաֆիստների կենտրոնական տանը:
