Ֆրանսիական նորաձևության Christian Dior տունը հայտարարել է, որ «հարգում է չին ժողովրդի զգացմունքները» այն բանից հետո, երբ Շանհայում Dior ցուցահանդեսում ցուցադրված լուսանկարներից մեկը վրդովմունք է առաջացրել չինացիների շրջանում:
Ավելի վաղ Շանհայում բացվել էր Christian Dior-ի Lady Dior անվանումով ցուցահանդեսը, որի շրջանակներում կազմակերպվել էր լուսանկարչական ցուցահանդես: Լուսանկարներից մեկը պայուսակը ձեռքին ասիացի աղջկա դիմանկարն էր, որն առաջացրել էր չինացիների վրդովմունքը: Չինացիների կարծիքով՝ լուսանկարը չինուհիներին «վատ լույսի տակ» է ներկայացրել:
Երբ լուսանկարի հանրային քննադատությունը հայտնվել է համացանցում, Dior-ը «անմիջապես մեծ նշանակություն է տվել դրան և անմիջապես ջնջել լուսանկարը Dior-ի պաշտոնական կայքից և հանել ցուցահանդեսից:
«Dior-ը, ինչպես միշտ, հարգում է չինացիների զգացմունքները, խստորեն հետևում է չինական օրենսդրությանը և աշխատում է համապատասխան գերատեսչությունների հետ՝ վերանայելու և հաստատելու բոլոր հրապարակային ցուցադրված աշխատանքները», – նշվում է հաղորդագրությունում:
Անցյալ շաբաթ Beijing Daily-ի չինական հրատարակությունը հրապարակեց հոդված՝ «Ահա թե ինչպիսին են չինուհիները. Արևմտյան շքեղ ապրանքանիշերը վերադարձել են հին…» վերնագրով հոդված: «Լուսանկարում պատկերված է մի մոդել՝ փոքրիկ կծկված աչքերով, կապտասև ստվերներով, մռայլ պեպենավոր դեմքով, յուղոտ մազերով և դեռ Ցին դինաստիայի հագուստով»,–գրում է թերթը։
China Women’s News-ը լուսանկարի վերաբերյալ իր հոդվածում գրել է, որ ցուցահանդեսը ևս մեկ անգամ ցուցադրել է «արևմտյան որոշ ապրանքանիշերի գեղագիտական ու մշակութային ամբարտավանություն և նախապաշարմունք» և ունի «չինական մշակույթը խեղաթյուրելու» մտադրություն:
