Իսպանացի անվանի մասնագետ Վիսենտե դել Բոսկեն խոսել է Մադրիդի «Ռեալի» գլխավոր մարզիչ Կառլո Անչելոտիի մասին.

«Անչելոտին հիանալի օրինակ է իսպանական ֆուտբոլի համար։ Խոսքս խաղադաշտում գործողությունների մասին չէ, այլ այն, թե ինչպես է ակումբը ներկայացվում։ Նա միշտ քաղաքավարի է և «Ռեալի» խորհրդանշին է։

Անչելոտիի գլխավորությամբ թիմը միշտ լավ է ներկայանում, իսկ հանդերձարանում հիանալի մթնոլորտ է։ Ես իսկապես հավատում եմ լավ հարաբերություններին։ Առողջ աշխատանքային միջավայրը հանդերձարանի գլխավոր գաղտնիքն է»,- մեջբերում է Cadena SER-ը։

Վիսենտե դել Բոսկեն 1999-2003 թթ. մարզել է «Արքայական ակումբը»։ Իսպանական գրանդը Դել Բոսկեի հետ 7 տիտղոս է նվաճել, այդ թվում` երկու անգամ հաղթելով Չեմպիոնների լիգան։ Հետագայում մասնագետը մարզել է Իսպանիայի հավաքականը, որը նրա գլխավորությամբ 2010 թ. դարձել է աշխարհի, իսկ 2012 թ.` Եվրոպայի չեմպիոն։