Աշխարհի երրորդ ռակետ, ռուս թենիսիստ Դանիլ Մեդվեդևը բացատրել է, թե ինչու Australian Open-ից առաջ չի մասնակցել որևէ պաշտոնական մրցաշարի:

«Ես ժամանեցի Ավստրալիա հունվարի 6-ի երեկոյան: Որոշեցինք, որ այս ժամանակահատվածը բավարար կլինի պատրաստվելու համար։ Ես ցուցադրական մրցաշարի մասնակցեցի և ինձ հաջողվեց հաղթել։ Հիանալի զգացողություն էր։ Այս տարի ես որոշեցի, որ գոնե մեկ անգամ պետք է փորձեմ այլ կերպ նախապատրաստվել և տեսնել, թե ինչ կլինի: Արդյո՞ք սա ռիսկ է: Կարծում եմ՝ ամեն ինչ ռիսկային է թվում, եթե դա անում ես առաջին անգամ: Երբ ես 35 տարեկան լինեմ, չէի ուզենա պատմել, որ երբեք Ամանորը տանը չեմ նշել։ Չորս տարվա մեջ առաջին անգամ արձակուրդ ունեցա մրցաշրջանի վերջում։ Եթե ​​ես այստեղ գայի նախապատրաստական ​​մրցաշարերի համար, ապա երկու շաբաթ կխաղայի, հետո դադար չէի ունենա»,- Australian Open-ի մամուլի ծառայության հետ զրույցում ասել է Մեդվեդևը:

Հիշեցնենք, որ Դանիլ Մեդվեդևը Ավստրալիայի բաց առաջնությունը կսկսի ֆրանսիացի Թերենս Ատմանի հետ մրցախաղով: