«Բարսելոնայի» կիսապաշտպան Դանի Օլմոն հայտարարել է, որ ակումբի գլխավոր նպատակը բոլոր տիտղոսները նվաճելն է, գրում է Marca-ն։
«Ուրախ եմ, որ մարդիկ ոգեշնչված են։ Այստեղ եմ եկել հաղթելու։ Վստահ եմ` մեր թիմն ի զորու է տիտղոսներ նվաճել։ Մենք շարունակում ենք պայքարը։
Մենք միշտ ավելիին ենք ձգտում, իսկ մարզչական շտաբը պահանջում է ավելի ու ավելի շատ գոլեր խփել։ Այժմ մրցաշրջանի լավագույն պահն է։ Թիմը լավ վիճակում է։
Մեր նպատակը բոլոր տիտղոսները նվաճելն է։ Չեմպիոնների լիգայի եզրափակիչում «Ռեալի» դեմ մրցելը հիանալի կլիներ»,- ասել է իսպանացի ֆուտբոլիստը։
«Բարսելոնան» Իսպանիայի Լա լիգայում 27 խաղից հետո 60 միավորով մրցաշարային աղյուսակի առաջատարն է։ Կատալոնական ակումբը պայքարը շարունակում է Իսպանիայի գավաթի խաղարկության կիսաեզրափակիչում։ «Բլաուգրանան» դուրս է եկել նաև Չեմպիոնների լիգայի քառորդ եզրափակիչ:
