«Բարսելոնայի» պաշտպան Դանի Ալվեսը խոստովանել է, որ ցանկանում է Բրազիլիայի հավաքականի կազմում մասնակցել աշխարհի 2022 թվականի առաջնությանը:
«Ես ապրում եմ նպատակներով, և դրանք միշտ պետք է լինեն կարճաժամկետ: Իմ առաջնահերթությունը «Բարսելոնա» վերադառնալն էր: Հիմա աշխարհի առաջնությունն է դարձել իմ առաջնահերթ նպատակը, քանի որ նախորդը բաց եմ թողել վնասվածքի պատճառով։
Ես շատ կաշխատեմ՝ այնտեղ լինելու իրավունքը վաստակելու համար։ Ես գիտեմ, որ դա պայմանավորված է իմ խաղամակարդակով, որը ես կցուցադրեմ այստեղ»,- Ալվեսի խոսքն է մեջբերում «Բարսելոնայի» մամուլի ծառայությունը։
Կատարում կայանալիք աշխարհի առաջնությունը կմեկնարկի 2022 թվականի նոյեմբերի 21-ին և կավարտվի դեկտեմբերի 18-ին։ Մրցաշարի ժամանակ Ալվեսն արդեն 39 տարեկան կլինի։
Հավելենք՝ Բրազիլիայի ընտրանին արդեն ապահովել է իր տեղը ԱԱ-2022-ի հիմնական փուլում:
