FastNews-ը շարունակում է Fastex Պրեմիեր լիգայի աշնանային հատվածում թիմերի ելույթների ամփոփումը: Այսօր կանդրադառնանք «Ալաշկերտին»: 

1. Fastex Պրեմիեր լիգայում 12-րդ մրցաշրջանն անցկացնող «Ալաշկերտն»  առաջնության աշնանային հատվածն ավարտեց 10-րդ հորիզոնականում՝ 17 հանդիպումներում վաստակելով ընդամենը 13 միավոր (3 հաղթանակ, 4 ոչ-ոքի, 10 պարտություն, խփած և բաց թողած գոլեր՝ 12-32), ինչը հնարավոր միավորների 25,4 տոկոսն է:

Նախորդ առաջնության նույն ժամանակահատվածի համեմատ «Ալաշկերտը» զգալիորեն վատթարացրել է ցուցանիշները՝ 16 միավոր պակաս վաստակելով: Հիշեցնենք, որ 2023/24թթ. առաջնության մեկնարկային 17 հանդիպումներում ալաշկերտցիները 29 միավոր էին վաստակել (9 հաղթանակ, 2 ոչ-ոքի, 6 պարտություն, խփած և բաց թողած գոլեր՝ 29-22), ինչը հնարավոր միավորների 56,8 տոկոսն էր: «Ալաշկերտն» ընթանում էր 5-րդ տեղում:

2. Առաջնության աշնանային հատվածում «Ալաշկերտի» գործողությունները ղեկավարեցին 2 մարզիչներ: Մեկնարկային 11 խաղերում թիմի գլխավոր մարզիչն  Աբրահամ Խաշմանյանն էր, որի օրոք ալաշկերտցիները 9 միավոր վաստակեցին (2 հաղթանակ, 3 ոչ-ոքի, 6 պարտություն, խփած և բաց թողած գոլեր՝ 7-20), ինչը հնարավոր միավորների 27,2 տոկոսն է:

Հաջորդ 6 խաղերում թիմի գործողությունները ղեկավարում էր Էդգար Թորոսյանը, որի գլխավորությամբ ալաշկերտցիները 4 միավոր վաստակեցին (1 հաղթանակ, 1 ոչ-ոքի, 4 պարտություն, խփած և բաց թողած գոլեր՝ 5-12), ինչը հնարավոր միավորների 22,2 տոկոսն է:

3. «Ալաշկերտը»  սեփական դաշտում անցկացրած 8 հանդիպումներում վաստակեց հնարավոր միավորների 25 տոկոսը (1 հաղթանակ, 3 ոչ-ոքի, 4 պարտություն, խփած և բաց թողած գոլեր՝ 8-19): Տնային խաղերում ալաշկերտցիները պարտվել են «Ուրարտուին» (0-3), «Վեստ Արմենիային» (0-2), «Նոային» (0-6) և «Շիրակին» (1-3):

Հյուրընկալվելիս անցկացրած 9 հանդիպումներում «Ալաշկերտի» օգտին 7 միավոր գրանցվեց (2 հաղթանակ, 1 ոչ-ոքի, 6 պարտություն, խփած և բաց թողած գոլեր՝ 4-13), ինչը հնարավոր միավորների 25,9 տոկոսն է: Մրցակցի դաշտում ալաշկերտցիները հաղթել են «Փյունիկին» (2-0) և «Գանձասարին» (1-0):

4. «Ալաշկերտը» 2 անգամ 3 անընդմեջ պարտություն կրեց, 7 խաղ ընթացավ առանց հաղթանակի: Հայաստանի քառակի չեմպիոնը 17 հանդիպումներից 9-ում գոլ չխփեց, միայն 4 խաղում դարպասն անառիկ պահեց: 4 խաղ անընդմեջ, 371 րոպե շարունակ ալաշկերտցիներին չհաջողվեց գրավել մրցակիցների դարպասները:

«Ալաշկերտը» խոշոր հաշվով պարտվեց «Ուրարտուին» (0-3) և «Նոային» (0-6, 0-4), այդ կարգի հաղթանակ չտոնեց:

5. «Ալաշկերտի» մասնակցությամբ հանդիպումներում նշանակվել է 11մ 8 հարված, որից իրացվել է 6-ը: Թիմի օգտին նշանակված 5 հարվածներից 4-ն է ավարտվել դարպասի գրավմամբ:

Պետրոս Ավետիսյանը «Գանձասարի» հետ երկու խաղերում էլ 11մ հարվածներով խոցել է Սերգեյ Դոցենկոյի պաշտպանած դարպասը: Բենիկ Հովհաննիսյանը գրավել է Դանիլո Կուչերի («Արարատ-Արմենիա») պաշտպանած դարպասը: Ժոզե Էմբալուն երկու հարվածներից մեկն է դիպուկ իրացրել՝ գրավելով «Վանի» դարպասապահ Դանիիլ Պոլյանսկու պաշտպանած դարպասը: Իսկ ահա փյունիկցի Ստանիսլավ Բուչնևը հաղթող է դուրս եկել Էմբալուի հետ մենամարտում:

Թիմի դարպասին նշանակված 11մ 3 հարվածներից 2-ն է իրացվել: «Նոայի» հարձակվող Գոնսալո Գրեգորիոն խոցել է Վալերիո Վիմերկատիի պաշտպանած դարպասը: «Վեստ Արմենիայի» ռմբարկու Զախար Տարասենկոն էլ գրավել է Գոռ Մանուկյանի պաշտպանած դարպասը: Վերջինս հետ է մղել Տենտոն Յենեի («Արարատ-Արմենիա») հարվածը:

6. Արդյունավետությամբ «Ալաշկերտը» 10-րդն էր՝ գերազանցելով միայն «Գանձասարին»: Առաջնության աշնանային հատվածում խփած 12 գոլերի հեղինակներ դարձան 7 ալաշկերտցիներ: Վաժա Պացացիան, Չապի Կատոն, Բենիկ Հովհաննիսյանը, Նարեկ Մանուկյանն ու Պետրոս Ավետիսյանը բացեցին գոլերի հաշիվն «Ալաշկերտում»:

Առավել արդյունավետ գործեց Սարգիս Մեթոյանը՝ խփելով 4 գոլ:

7. Նարեկ Մանուկյանը դարձավ Fastex Պրեմիեր լիգայում «Ալաշկերտում» գոլ խփած ամենաերիտասարդ ֆուտբոլիստը՝ նոյեմբերի 4-ին «Շիրակի» դարպասը գրավելով 20 տարեկան 321 օրականում: Նա գերազանցեց թիմի նախկին ֆուտբոլիստ Կարեն Նալբանդյանի ցուցանիշը, որը գոլերի հաշիվը բացել էր 21 տարեկան 127 օրականում:

Չապի Կատոն էլ դարձավ Fastex Պրեմիեր լիգայում «Ալաշկերտում» գոլ խփած ամենաերիտասարդ լեգեոնականը՝ օգոստոսի 18-ին «Փյունիկի» դարպասը գրավելով 21 տարեկան 111 օրականում: Նա գերազանցեց թիմի նախկին ֆուտբոլիստ Դարկո Վուչիչի ցուցանիշը, որը գոլի հեղինակ էր դարձել 22 տարեկան 186 օրականում:

Չապի Կատոն ընդգրկվեց Fastex Պրեմիեր լիգայում «Ալաշկերտում» գոլ խփած ամենաերիտասարդ ֆուտբոլիստների տասնյակում: Նա թիմի կազմում նորամուտը նշել էր 21 տարեկան 96 օրականում և ընդգրկվել էր Fastex Պրեմիեր լիգայում «Ալաշկերտում» խաղացած ամենաերիտասարդ լեգեոնականների տասնյակում:

Ժոզե Էմբալուն (31 տարեկան 138 օրական) ընդգրկվեց Fastex Պրեմիեր լիգայում «Ալաշկերտում» գոլ խփած ամենատարեց լեգեոնականների տասնյակում: Այդ ցանկից դուրս մնաց Մլադեն Զելկովիչը (31 տարեկան 108 օրական):

8. «Ալաշկերտն» առաջնության այն երկու թիմերից մեկն է (մյուսը «Վեստ Արմենիան» է), որի  դարպասը պաշտպանեցին 3 դարպասապահներ: Վալերիո Վիմերկատին անցկացրած 10 խաղում 20 գոլ բաց թողեց (միջինը մեկ խաղում՝ 2 գոլ), 2 անգամ դարպասն անառիկ պահեց:

Գոռ Մանուկյանը 6 խաղում 9 գոլ բաց թողեց (միջինը մեկ խաղում՝ 1,5 գոլ), 2 անգամ դարպասն անառիկ պահեց: Վլադ Չատունցն «Արարատ-Արմենիայի» հետ խաղում 3 գոլ բաց թողեց:

9. Առաջնության աշնանային հատվածում «Ալաշկերտի» ամենատարեց ֆուտբոլիստները 33-ամյա Ռումյան Հովսեփյանն ու Վադիմ Պարամոնովն էին:

Fastex Պրեմիեր լիգայում անցկացրած խաղերի ընդհանուր քանակով (253) «Ալաշկերտի» ներկայիս կազմից ամենափորձառուն 30-ամյա Վասպուրակ Մինասյանն է: Սեպտեմբերի 28-ին «Վեստ Արմենիայի» հետ մրցավեճում Մինասյանը 250-րդ խաղի հոբելյանն էր նշել:

Իսկ «Ալաշկերտում» թիմի ներկայիս կազմից Հայաստանի առաջնություններում բոլորից շատ՝ 58 խաղի է մասնակցել Ալեքսանդր Գլիշիչը:

21-ամյա Յուրի Մարտիրոսյանը, Չապի Կատոն, Նարեկ Մանուկյանն ու Ալեն Պողոսյանն «Ալաշկերտի» ամենաերիտասարդ ֆուտբոլիստներն էին: Մանուկյանը թիմի կազմում նորամուտը նշել է 2022թ. հոկտեմբերի 20-ին 18 տարեկան 305 օրականում՝ մասնակցելով «Լեռնային Արցախի» հետ կայացած առաջնության հանդիպմանը: Այդ ցուցանիշով նա Fastex Պրեմիեր լիգայում «Ալաշկերտում» խաղացած ամենաերիտասարդ ֆուտբոլիստների ցանկում զբաղեցնում է 7-րդ հորիզոնականը:

10. Առաջնության աշնանային հատվածի 17 հանդիպումներում «Ալաշկերտի»  կազմում խաղադաշտ դուրս եկան 29 ֆուտբոլիստներ, որոնցից 11-ը լեգեոնականներ էին: 16 ֆուտբոլիստներ՝ Վալերիո Վիմերկատին, Վլադ Չատունցը, Գոռ Մանուկյանը, Կլինտոն Բանգուրան, Յուրի Մարտիրոսյանը, Արմեն Մանուչարյանը, Վաժա Պացացիան, Զաքարիա Սանոգոն, Չապի Կատոն, Նարեկ Հովհաննիսյանը, Մուրիլո Ռոսան, Արմեն Հովհաննիսյանը, Ալեն Պողոսյանը, Հայկ Մուսախանյանը, Արսեն Գալստյանը և Պետրոս Ավետիսյանն առաջնության աշնանային հատվածում նորամուտը նշեցին «Ալաշկերտում»:

Ալաշկերտցիներն առաջնության հանդիպումներում 32 անգամ զգուշացվել են, 5 ֆուտբոլիստներ՝ Ռումյան Հովսեփյանը, Արմեն Մանուչարյանը, Նարեկ Մանուկյանը, Բենիկ Հովհաննիսյանն ու Հայկ Մուսախանյանը մեկական անգամ հեռացվել են խաղադաշտից: Կարմիր քարտերի քանակով «Ալաշկերտի» ֆուտբոլիստները յուրօրինակ ռեկորդակիրներ են:

Առավել հաճախ՝ 5 անգամ դեղին քարտի է արժանացել Արման Խաչատրյանը:

FastNews-ը ներկայացնում է «Ալաշկերտի» ֆուտբոլիստների ցուցանիշներն ընթացիկ առաջնության աշնանային հատվածում:

Ֆուտբոլիստներ	Խաղ	Գոլ	Զ (Հ)
1. Սարգիս Մեթոյան	17	4	-
2. Արման Խաչատրյան	16	-	5
3. Ռումյան Հովսեփյան	15	-	4 (1)
4. Արմեն Մանուչարյան	15	-	3 (1)
5. Յուրի Մարտիրոսյան	15	-	-
6. Չապի Կատո	14	1	2
7. Բենիկ Հովհաննիսյան	14	1	3 (1)
8. Արմեն Հովհաննիսյան	13	-	3
9. Ժոզե Էմբալու	12	2	1
10. Պետրոս Ավետիսյան	12	2	-
11. Մուրիլո Ռոսա	11	-	1
12. Վաժա Պացացիա	10	1	1
13. Վալերիո Վիմերկատի	10	-20	3
14. Վահագն Հայրապետյան	10	-	1
15. Ալեքսանդր Գլիշիչ	10	-	-
16. Զաքարիա Սանոգո	9	-	-
17. Հայկ Մուսախանյան	8	-	- (1)
18. Վասպուրակ Մինասյան	7	-	-
19. Կլինտոն Բանգուրա	7	-	2
20. Ալեն Պողոսյան	7	-	2
21. Նարեկ Հովհաննիսյան	6	-	-
22. Գոռ Մանուկյան	6	- 9	-
23. Բլադիմիր Դիաս	5	-	-
24. Նարեկ Մանուկյան	4	1	- (1)
25. Վադիմ Պարամոնով	4	-	-
26. Արսեն Գալստյան	3	-	-
27. Արթուր Քարտաշյան	2	-	1
28. Վլադ Չատունց	1	- 3	-
29. Ջեֆերսոն Ռեիս	1	-	-

Fastex Պրեմիեր լիգայի բոլոր հանդիպումները՝ Fast TV հավելվածում (iOS, Android):