«Բրյուգեն» Չեմպիոնների լիգայի անցումային փլեյ-օֆֆից դուրս թողեց «Ատալանտային»` պատասխան խաղում հաղթելով 3-1 հաշվով։ Դիմակայության առաջին խաղում բելգիական ակումբը նույնպես հաղթել էր` 2-1։
Արդեն առաջին խաղակեսում հյուրերը վճռեցին հանդիպման ելքն ու երեք անպատասխան գնդակ ուղարկեցին մրցակցի դարպասը։
Երկրորդ խաղակեսում «Ատալտան» փորձեց խաղ վերադառնալ և 46-րդ րոպեին Ադեմոլա Լուքմանի ջանքերով մեկ գնդակ հետ բերեց։
61-րդ րոպեին դիմակայության ինտրիգը կարող էր վերականգնվել, սակայն Լուքմանը վրիպեց 11-մետրանոցից. «Բրյուգեին» փրկեց դարպասապահ Սիմոն Մինյոլեն։
«Բրյուգեն» 1/8 եզրափակիչում կմրցի ֆրանսիական «Լիլի» կամ անգլիական «Ասթոն Վիլայի» դեմ։
«Բավարիան» մեծ դժվարությամբ հաղթահարեց Գլազգոյի «Սելթիկի» արգելքը։
Դիմակայության պատասխան խաղում Շոտլանդիայի չեմպիոնը 63-րդ րոպեին առաջ անցավ հաշվի մեջ։ Երբ թվում էր, թե հանդիպումը կշարունակվի լրացուցիչ ժամանակում, ավելացված չորրորդ րոպեին կանադացի պաշտպան Ալֆոնսո Դևիսը խփեց մյունխենյան գրանդի պատասխան գնդակը։ Հանդիպումն ավարտվեց 1-1, իսկ «Բավարիան» դուրս եկավ 1/8 եզրափակիչ։
Վենսան Կոմպանիի գլխավորած թիմն առաջին խաղում 2-1 հաշվով հաղթելու շնորհիվ մրցակցին դուրս թողեց պայքարից և հաջորդ փուլում կհանդիպի Լևերկուզենի «Բայերին» կամ Մադրիդի «Աթլետիկոյին»։
«Բենֆիկան» նույնպես շարունակում է պայքարը։ Պորտուգալական ակումբը «Մոնակոյի» դեմ պատասխան խաղում թրիլերային ոչ-ոքի (3-3) գրանցեց, իսկ դիմակայությունում հաղթեց 4-3 հաշվով։
1/8 եզրափակիչում Բրունու Լաժեի գլխավորած թիմի հավանական մրցակիցներն են «Բարսելոնան» և «Լիվերպուլը»։
Չեմպիոնների լիգա, անցումային փլեյ-օֆֆ, պատասխան հանդիպումներ
«Բավարիա» (Գերմանիա) - «Սելթիկ» (Շոտլանդիա)` 1-1 (տեսանյութ)
Ալֆոնսո Դևիս, 90+4 - Նիոկլաս-Գերիտ Կյուն, 63
«Ատալանտա» (Իտալիա) - «Բրյուգե» (Բելգիա)` 1-3 (տեսանյութ)
Ադեմոլա Լուքման, 46 - Չեմսդին Թալբի, 3, 27, Ֆեռան Յուտգլա, 45+3
Չիրացված 11-մետրանոց` Ադեմոլա Լուքման, 61 («Ատալանտա»)
Հեռացում` Ռաֆայել Տոլոյ, 87 («Ատալանտա»)
«Բենֆիկա» (Պորտուգալիա) - «Մոնակո» (Ֆրանսիա)` 3-3 (տեսանյութ)
Քերեմ Ակթյուրքօղլու, 22, Վանգելիս Պավլիդիս, 76 (11մ), Օրկան Կյոկչու, 84 - Տակումի Մինամինո, 32, Էլիես Բեն-Սեգիր, 51, Ջորջ Իլենիխենա, 81
