Մյունխենի «Բավարիան» հայտարարել է, որ թիմի նախկին պաշտպան Ժերոմ Բոատենգը մարզչական պրակտիկայի համար չի վերադառնա ակումբ:
«Այս շաբաթ «Բավարիայի» և Ժերոմ Բոատենգի միջև կառուցողական քննարկումների արդյունքում որոշվեց, որ նա պրակտիկա չի անցնի ակումբում։ Ժերոմը սերտորեն կապված է «Բավարիայի» հետ և չի ցանկանում, որ ակումբը վնաս կրի իր շուրջ ծավալվող վիճահարույց քննարկումների պատճառով»,- նշված է ակումբի պաշտոնական հայտարարությունում:
Բոատենգն ինստագրամյան էջում շնորհակալություն է հայտնել ակումբին, գլխավոր մարզիչ Վենսան Կոմպանիին ու երկրպագուներին՝ նշելով, որ իր ներկայիս առաջնահերթությունները սեփական նախագծերն ու մարզչական լիցենզիա ստանալն են:
Գերմանիայի չեմպիոնի երկրպագուները շաբաթներ շարունակ դժգոհության ալիք էին բարձրացրել` պահանջելով թույլ չտալ Բոատենգի վերադարձը: Երկրպագուների զայրույթի պատճառը Գերմանիայի հավաքականի նախկին ֆուտբոլիստին առաջադրված մեղադրանքն է: 2024 թվականին դատարանը նրան մեղավոր էր ճանաչել նախկին ընկերուհու նկատմամբ բռնություն գործադրելու գործով: Բոատենգը տուգանք էր վճարել` խուսափելով կալանավորվելուց:
