Ռուսական «Ռոստովի» և Հայաստանի հավաքականի կիսապաշտան Խորեն Բայրամյանը մեկնաբանել է Թուրքիայի հետ Եվրո-2024-ի որակավորման նույն խմբում հայտնվելն ու ասել՝ ում է ցանկանում տեսնել ազգային թիմի գլխավոր մարզչի պաշտոնում:
«Երկար տարիներ Հայաստանի ու Թուրքիայի հավաքականները չեն առանձնացվել տարբեր խմբերում, այնպես որ, նման վիճակահանությունը սպասելի էր: Միշտ էլ պատրաստ էինք խաղալ Թուրքիայի հետ, եթե հայտնվեինք նույն խմբում, ամեն ինչ կարգին է: Սա լրացուցիչ մոտիվացիա է ֆուտբոլիստների համար: Կարծում եմ՝ հետաքրքիր հանդիպումներ կլինեն:
Հայաստանի հավաքականի գլխավոր մարզչի պաշտոնում կցանկանայի տեսնել Վալերի Գեորգիևիչին: Եթե Կարպինը գլխավորեր հավաքականը, նրա հետ հաստատ դուրս կգայինք Եվրո-2024-ի եզրափակիչ փուլ»,- 30-ամյա ֆուտբոլիստի խոսքը փոխանցում է «РБ Спорт»-ը:
Հիշեցնենք, որ Հայաստանի հավաքականն ընդգրկվել է Եվրո-2024-ի որակավորման փուլի D խմբում, որտեղ մրցակիցներն են Թուրքիան, Խորվաթիան, Ուելսն ու Լատվիան:
Խորեն Բայրամյանն ազգային հավաքականում ելույթ է ունենում 2020 թվականի սեպտեմբերի 5-ից և անցկացրած 21 խաղում խփել է 2 գոլ:
