FastNews-ը նախորդ հրապարակման մեջ ներկայացրել էր Հայաստանի առաջնություններում միևնույն թիմի կազմում երկար տարիներ հանդես եկած այն ֆուտբոլիստների ցանկը, որոնք հավատարմորեն պաշտպանել են իրենց համար հարազատ դարձած ակումբի պատիվը: Նրանցից ոմանք ֆուտբոլային ողջ կարիերան անցկացրել են Բարձրագույն խմբի առաջնության մասնակից միայն մեկ թիմում:

Իսկ ովքե՞ր են ՀՀ առաջնությունների պատմության ընթացքում առավել հաճախակի թիմից թիմ տեղափոխվել: Նրանց թիվն անհամեմատ ավելի մեծ է: Հարկ է նշել, որ տեղափոխությունների մի մասը տեղի է ունեցել անկախ ֆուտբոլիստների ցանկությունից, քանի որ այս 33 տարիների ընթացքում Բարձրագույն խմբում հանդես եկած մի շարք ակումբներ տարբեր պատճառներով լուծարվել են:

Տեղափոխությունների թվով յուրօրինակ ռեկորդակիրը Հայկ Նարիմանյանն է: 1995-2006թթ. ՀՀ Բարձրագույն խմբի առաջնություններում 192 խաղ անցկացրած Նարիմանյանը հասցրել է կրել 13 թիմերի մարզաշապիկները:

Բարձրագույն խմբում նա իր կարիերան սկսել է 17 տարեկանում՝ «Կոտայք-2-ի» կազմում մասնակցելով 1995թ. գարնանային-անցումային մրցաշարին: Մրցաշրջանի ավարտից հետո այդ թիմի բազայի վրա հիմնվեց «Երևան» ակումբը, որում ընդգրկվեց նաև Նարիմանյանը: Հաջորդ մրցաշրջանում նա արդեն «Կոտայքի» կազմում էր, իսկ 1997թ. առաջնությունն անցկացրեց «Էրեբունի-ՀՄՄ-ում», որում խաղաց նաև հաջորդ տարի:

1999թ. առաջնությունը Նարիմանյանը դիմավորեց «Ղարաբաղում»: Վերջինս 15-րդ տուրից հետո հրաժարվեց առաջնության հետագա մասնակցությունից, ուստի Նարիմանյանը ստիպված էր առաջնության մնացած հատվածն անցկացնել այլ թիմում՝ տեղափոխվելով Բարձրագույն խմբում նորամուտը նշող Երևանի «Զվարթնոց»: Հենց այս թիմի կազմում էլ առավել երկար՝ 1999-2000թթ. հանդես եկավ ֆուտբոլիստը՝ մասնակցելով 40 խաղի:

Հետագա տարիներին Նարիմանյանը մեկական մրցաշրջան հանդես եկավ «Սպարտակում», «Բանանցում», «Արաքսում» ու «Միկայում» (2003թ.), «Արարատում», Երևանի «Լեռնագործում» և «Ուլիսում»:

2-րդ ցուցանիշն ունի Անդրանիկ Զանազանյանը, որը 11 մրցաշրջանների ընթացքում նույնքան թիմերի պատիվն է պաշտպանել:

Ընթացիկ առաջնության մասնակից ֆուտբոլիստներից յուրօրինակ ռեկորդակիրը «Գանձասարի» կիսապաշտպան Սարգիս Շահինյանն է, որի համար կապանյան թիմը 10-րդն է: Շահինյանը պրոֆեսիոնալ ֆուտբոլում իր ելույթները սկսել է պատանի տարիքում «Միկայի» կազմում՝ նորամուտը նշելով 2011թ. օգոստոսի 28-ին «Ուլիսի» հետ կայացած առաջնության խաղում: Թիմի գլխավոր մարզիչ Յոժեֆ Բուբենկոն 85-րդ րոպեին Կոնստանտին Մանդրիչենկոյի փոխարեն խաղադաշտ դուրս բերեց Սարգիս Շահինյանին, որն ընդամենը 15 տարեկան 352 օրական էր:

Հաջորդ մրցաշրջանում պատանի ֆուտբոլիստն արդեն թիմի հիմնական կազմի խաղացող էր ու մասնակցեց առաջնության 42 հանդիպումներից 40-ին: Նա իր առաջին տիտղոսը նվաճեց՝ թիմակիցների հետ դառնալով Հայաստանի սուպերգավաթակիր:

2015/16թթ. մրցաշրջանում հանդես գալով «Փյունիկում», Շահինյանը 2-րդ անգամ վայելեց Սուպերգավաթի նվաճման բերկրանքը: Հաջորդ երկու մրցաշրջաններն անցկացնելով «Գանձասար-Կապանում», Շահինյանը տեղափոխվեց «Ալաշկերտ», որի կազմում էլ 2018թ. դարձավ Հայաստանի եռակի սուպերգավաթակիր: Հետագայում նա խաղացել է «Արարատում», «Լոռիում», «Արարատ-Արմենիայում», «Նոայում» և «Վեստ Արմենիայում», իսկ ընթացիկ առաջնությունում նորամուտը նշեց «Գանձասարում»:

Արթուր Ավագյանը, Տիգրան Լ. Հովհաննիսյանն ու Արթուր Ս. Մինասյանը ևս հանդես են եկել 10 թիմերի կազմում: Ընդ որում Տիգրան Լ. Հովհաննիսյանը բոլորից երկար՝ 8 տարի (1993-2000թթ.) հանդես է եկել միևնույն թիմում՝ Արարատի «Ցեմենտում», որի կազմում մասնակցել է 154 խաղի, 2 անգամ նվաճել է Հայաստանի չեմպիոնի և գավաթակրի տիտղոսները, մեկական անգամ դարձել է սուպերգավաթակիր և արծաթե մրցանակակիր: Եվ միայն «Ցեմենտի» լուծարումից հետո են սկսվել ֆուտբոլիստի դեգերումները թիմից թիմ:

Հայաստանի Բարձրագույն խմբի առաջնություններում 16 մրցաշրջան անցկացրած Արթուր Ավագյանի ֆուտբոլային երկարատև կարիերան այնքան էլ հարթ չի ընթացել, քանի որ մի քանի անգամ թիմերի լուծարման պատճառով ստիպված է եղել որոշ ժամանակ հարկադիր պարապուրդի մատնվել մինչև նոր ակումբ տեղափոխվելը:

Բարձրագույն խմբում Ավագյանի նորամուտը կայացել է 2005թ. ապրիլի 17-ին «Լեռնային Արցախի» կազմում «Բանանցի» հետ մրցավեճում: Հանդիպման 77-րդ րոպեին Արկադի Անդրեասյանը պատանի ֆուտբոլիստին խաղադաշտ մտցրեց Արարատ Ղազարյանի փոխարեն: Այդ օրն Արթուրը 17 տարեկան 287 օրական էր: Սակայն առաջնության 11-րդ տուրից հետո «Լեռնային Արցախը» հրաժարվեց մրցաշարի հետագա մասնակցությունից:

Հետագա տարիներին Արթուր Ավագյանը խաղացել է «Կիլիկիայում» (2008-2010թթ.), «Արարատում» (2011թ.), «Գանձասար-Կապանում» (2012/13-2015/16թթ.), «Ալաշկերտում» (2015/16թթ.), «Բանանցում» (2016/17-2018/19թթ.), «Լոռիում» (2019/20-2020/21թթ.), «Սևանում» (2021/22թթ.) և «Նորավանքում» (2021/22թթ.): Վերջին 3 թիմերից նա ստիպված է եղել հեռանալ ակումբների լուծարման պատճառով՝ ֆուտբոլային կարիերան ավարտելով «Փյունիկում»: Առավել երկար Ավագյանը ելույթ է ունեցել «Գանձասար-Կապանում»՝ Fastex Պրեմիեր լիգայում անցկացնելով 87 խաղ:

8 թիմերում հանդես եկած Սևադա Արզումանյանը 1996/97թթ. առաջնությունում հասցրել է կրել 3 ակումբների մարզաշապիկները: Առաջնությունը նա սկսել էր «Կոտայքում», այնուհետև 3-րդ տուրից հետո տեղափոխվել էր ԲԿՄԱ: Սակայն վերջինս առաջին շրջանի ավարտից հետո լուծարվել էր և Արզումանյանը ելույթները շարունակել էր «Վանում»:

2012/13թթ. առաջնությունում 3 թիմում է հանդես եկել նաև Հովհաննես Գրիգորյանը: Նա առաջնության մեկնարկում հանդես եկավ «Շիրակում», որի հետ պայմանագիրը խզելուց հետո տեղափոխվեց «Ուլիս», իսկ մրցաշարի գարնանային հատվածն անցկացրեց «Արարատում»: Հովհաննես Գրիգորյանը 8  անգամ փոխել է ակումբային գրանցումը:

Տեղափոխությունների առումով հետաքրքիր է նաև Արթուր և Արա Ոսկանյան եղբայրների վիճակագրությունը: Թեև Արան ավագ եղբորից ուղիղ 2 անգամ քիչ հանդիպում է (127) անցկացրել, սակայն նա էլ Արթուրի պես հանդես է եկել 8 թիմերի կազմում:

Բարձրագույն խմբում նրանք ֆուտբոլային կարիերան սկսել են միևնույն թիմում՝ Էջմիածնի «Զվարթնոցում». Արթուրը՝ 1993թ., Արան՝ հաջորդ մրցաշրջանում: Այնուհետև եղբայրները տեղափոխվել են «Վան»: 1997թ. նրանք կարճ ժամանակով բաժանվեցին. Արթուրը մեկնեց «Ղարաբաղ»: Հաջորդ մրցաշրջանում եղբայրները կրկին միասին էին, այս անգամ՝ արդեն «Ցեմենտում»:

Հետագայում Ոսկանյանները միասին հանդես եկան «Սպարտակում» ու «Բանանցում», ապա կարճ ժամանակով կրկին բաժանվեցին և հանդիպեցին նախ «Փյունիկում», ապա «Արարատում»:

FastNews-ը ներկայացնում է այն ֆուտբոլիստների ցանկը, որոնք ֆուտբոլային կարիերայում հանդես են եկել Բարձրագույն խմբի 8 և ավելի թիմերում՝ նշելով, թե ակումբներից որում է ֆուտբոլիստն ավելի երկար խաղացել, որ թվականներին և քանի խաղ է անցկացրել այդ թիմում:

Ֆուտբոլիստներ	Թիմ	Խաղ	Ակումբ
1.Հայկ Նարիմանյան	13	192	«Զվարթնոց» - 40
2.Անդրանիկ Զանազանյան	11	180	«Կոտայք» - 48
3.Տիգրան Լ. Հովհաննիսյան	10	305	«Ցեմենտ» - 154
4.Արթուր Ավագյան	10	259	«Գանձ.-Կապան» - 87
5.Սարգիս Շահինյան	10	231	«Ալաշկերտ» - 47
6.Արթուր Ս. Մինասյան	10	177	«Երևան» - 39
7.Արթուր Քոչարյան	9	357	«Գանձասար» - 94
8.Գևորգ Կասպարով	9	348	«Միկա» - 111
9. Հայկ Իշխանյան	9	279	«Գանձ.-Կապան» - 95
10.Կարեն Նավոյան	9	264	«Արարատ» - 92
11.Էդիկ Երիցյան	9	248	«Կոտայք» - 86
12.Աշոտ Գրիգորյան	9	236	«Բանանց» - 82
13.Գրիգոր Գրիգորյան	9	221	«Կիլիկիա» - 48
14.Արսեն Դալլաքյան	9	184	«Միկա» - 52
15.Գոռ Աթաբեկյան	9	162	«Ուլիս» - 68
16.Արկադի Չիլինգարյան	9	142	«Միկա» - 36
17.Սարգիս Նազարյան	8	299	«Զվարթնոց» - 86
18.Կարեն Գրիգորյան	8	256	«Երևան» - 74
19.Արթուր Ոսկանյան	8	254	«Բանանց» - 55
20.Սևադա Արզումանյան	8	229	«Արարատ» - 86
21.Նվեր Խաչատրյան	8	220	«Զվարթնոց» - 89
22.Արշակ Ամիրյան	8	208	«Արարատ» - 95
23.Արսեն Այվազյան	8	205	«Արարատ» - 96
24.Հովհաննես Գրիգորյան	8	205	«Բանանց» - 81
25.Արա Մարկոսյան	8	202	«Վան» - 65
26.Գևորգ Միրիջանյան	8	179	«Զվարթնոց» - 77
27.Մարատ Մկրտչյան	8	179	«Միկա» - 77
28.Ալբերտ Աճեմյան	8	156	«Երևան» - 78
29.Միխեիլ Սիմոնյան	8	147	«Ուլիս» - 47
30.Հայկ Հակոբյան	8	128	«Դվին» - 40
31.Արա Ոսկանյան	8	127	«Բանանց» - 37