Սաուդյան Արաբիան պատրաստվում է հյուրընկալել ֆուտբոլի աշխարհի 2034 թվականի առաջնությունը, քանի որ այս հարցում նրա հիմնական մրցակից Ավստրալիան պաշտոնապես հայտարարել է, որ մրցաշարն ընդունելու հայտ չի ներկայացնի:
Ավելի վաղ Սաուդյան Արաբիան նամակով դիմել էր ՖԻՖԱ-ին՝ հայտնելով մրցաշարը հյուրընկալելու իր մտադրությունը: Միջազգային ֆուտբոլի գլխավոր կառույցը նախապես հաստատել էր, որ Մունիալ-2034-ն ընդունելու համար կդիտարկի հայտեր միայն Ասիայից ու Օվկիանիայից:
«Մենք ուսումնասիրել ենք ՖԻՖԱ-ի աշխարհի առաջնության անցկացման հայտ ներկայացնելու հնարավորությունը և, հաշվի առնելով բոլոր գործոնները, եկել ենք այն եզրակացության, որ դա չենք անի Մունդիալ-2034-ի համար»,- ասված է հայտարարության մեջ:
Ստացվում է, որ մրցաշարն ընդունելու երկու հավակնորդներից մեկի՝ հայտ ներկայացնելուց հրաժարվելուց հետո Սաուդյան Արաբիան այս պահին մնում է միակ հավակնորդը:
