Ռուսաստանը ներկայացնող հայ թենիսիստուհի Էլինա Ավանեսյանը (71-րդ ռակետ) հաղթանակով է մեկնարկել «Մեծ սաղավարտի» տարվա առաջին մրցաշար Ավստրալիայի բաց առաջնությունում։

Առաջին շրջանում 21-ամյա թենիսիստուհին մրցել է Չինաստանի ներկայացուցիչ Չժոսուան Բայի հետ ու հաղթել 3 սեթում՝ 4-6, 7-5, 6-2։ Մրցախաղը տևել է 2 ժամ 27 րոպե։

Էլինա Ավանեսյանի հաջորդ մրցակիցը կլինի աշխարհի 8-րդ ռակետ, հույն Մարիա Սակարին, որը 6-4, 6-1 հաշվով հաղթեց Ճապոնիան ներկայացնող Նաո Հիբինոյին։