Սպորտային մարմնամարզության օլիմպիական չեմպիոն Արթուր Դալալոյանը և գեղասահքի Եվրոպայի փոխչեմպիոն Արթուր Դանիելյանը, որոնք ելույթ են ունենում Ռուսաստանի հավաքականներում, հրաժարվել են փոխել մարզական քաղաքացիությունը և միանալ Հայաստանի թիմերին, հայտնում է Metaratings.ru-ն:
Հայաստանի ազգային օլիմպիական կոմիտեն (ՀԱՕԿ) մարզաձևերի ֆեդերացիաների հետ միասին ակտիվորեն աշխատում է Ռուսաստանը ներկայացնող հայ մարզիկներին հրավիրելու ուղղությամբ։
Սպորտային մարմնամարզության Ռուսաստանի հավաքականի գլխավոր մարզիչ Վալենտինա Ռոդիոնենկոն հաստատել է, որ աշխարհի եռակի և Եվրոպայի 5-ակի չեմպիոն Դալալոյանը հրաժարվել է միանալ Հայաստանի հավաքականին:
«Դալալոյանը հրաժարվել է տեղափոխվել Հայաստանի հավաքական, դա ճիշտ է։ Այո, նրան առաջարկել են, բայց Արթուրը բավականին հստակ պատասխանել է՝ որտեղ է և ում հետ: Դալալոյանը ճիշտ է վարվել: Նա նորմալ, բարեկիրթ անձնավորություն է, և չէր կարող հենց այնպես տեղափոխվել»,- մարզիչի խոսքը մեջբերում է Metaratings.ru-ն:
Հիշեցնենք, որ Ռուսաստանի մարմնամարզիկներն ու գեղասահորդները մեկ տարուց ավելի չեն մասնակցում միջազգային մրցաշարերի:
