Սերբիայի մայրաքաղաք Բելգրադում ընթացող ըմբշամարտի աշխարհի առաջնությունում սեպտեմբերի 15-ին պայքարը սկսել են ազատ ոճի ըմբիշները: Մրցումային առաջին օրը Հայաստանն ունի 2 ներկայացուցիչ:

79 կգ քաշային Արման Ավագյանը որակավորման փուլում վաղաժամ 11-0 հաշվով հաղթեց կանադացի Ադամ Թոմսոնին:

Ավագյանը 1/8 եզրափակիչում կմրցի Ճապոնիան ներկայացնող Յուդայի Տակահաշիի հետ:

70 կգ քաշային կարգում 1/8 եզրափակիչից պայքարը կսկսի Արման Անդրեասյանը, որը կգոտեմարտի իտալացի Ջանլուկա Տալամոյի հետ:

Ազատ ոճի ըմբշամարտի Հայաստանի հավաքականի կազմում Բելգրադ են մեկնել նաև Մանվել Խնձրցյանը (57 կգ), Եվրոպայի կրկնակի չեմպիոն Արսեն Հարությունյանը (61 կգ), աշխարհի գավաթակիր Վազգեն Թևանյանը (65 կգ) և Հրայր Ալիխանյանը (74 կգ): Խնձրցյանը և Ալիխանյանը պայքարը կսկսեն սեպտեմբերի 16-ին, իսկ Հարությունյանը և Թևանյանը՝ սեպտեմբերի 17-ին։

Հիշեցնենք, որ հունահռոմեական ոճի ըմբշամարտի Հայաստանի հավաքականն աշխարհի առաջնությանը մասնակցել էր 8 ըմբիշով և նվաճել մեկական ոսկե ու բրոնզե մեդալ։ Օլիմպիական խաղերի ոսկե, արծաթե և բրոնզե մեդալակիր, Եվրոպայի հնգակի չեմպիոն Արթուր Ալեքսանյանը (97 կգ) դարձել էր աշխարհի քառակի չեմպիոն, իսկ աշխարհի ու Եվրոպայի չեմպիոն Մալխաս Ամոյանը (77 կգ) նվաճել էր բրոնզե մեդալ։