Ֆորմուլա 1-ը պատրաստվում է նոր, տեխնոլոգիապես և դիզայնով արմատական փոփոխությունների անցնելու դարաշրջանին։ 2026 թվականից ուժի մեջ մտնող նոր կանոնակարգերը, որոնք հաստատվել են FIA-ի կողմից, նպատակ ունեն ոչ միայն սպորտը դարձնելու ավելի «կանաչ», այլև կտրուկ մեծացնելու մրցավազքի անկանխատեսելիությունը և վազանցի հնարավորությունները։ Այս փոփոխությունները կբերեն բոլորովին նոր մարտահրավերներ թիմերի և պիլոտների համար։

Նախ և առաջ՝ բոլիդները կդառնան նկատելիորեն փոքր ու թեթև։ Բոլիդի նվազագույն քաշը կկրճատվի 30 կգ-ով, իսկ երկարությունը՝ 200 մմ-ով, մինչդեռ լայնությունը կնվազի 100 մմ-ով։ Այս քայլը կապահովի, որ մեքենաներն ավելի հեշտ մանևրեն մրցուղում։ Քաշի նվազեցմանը զուգահեռ, մեքենայի կայունությունը ևս կնվազի, քանի որ կտրուկ կկրճատվի աերոդինամիկայի միջոցով ստացվող ճնշման ուժը (30%-ով)։ Սա պիլոտներից կպահանջի վարպետություն՝ մեքենան վերահսկելու համար, հատկապես արագ շրջադարձերում, որտեղ սխալի գինը կլինի շատ բարձր։

Մեքենայի «սիրտը»՝ հիբրիդային շարժիչը, կվերափոխվի արմատապես։ Շարժիչի հզորությունը գրեթե կհավասարվի՝ 50% բենզինային և 50% էլեկտրական, ինչը նշանակում է էլեկտրական հզորության 300 տոկոսանոց աճ։ Այս փոփոխությունն իր հետ բերում է լուրջ մարտավարական խնդիր. վարորդները պետք է շատ ավելի ուշադիր լինեն էներգիայի կառավարման հարցում։ Եթե էլեկտրական ուժը սխալ օգտագործվի սկզբում, վարորդը կարող է մնալ առանց հզորության ուղիղ հատվածի վերջում։ Շատ կարևոր է նաև, որ շարժիչներն ամբողջությամբ անցնելու են 100% սինթետիկ վառելիքի, ինչը սպորտը կդարձնի էկոլոգիապես առավել մաքուր։

DRS համակարգը կփոխարինվի նոր երկակի մարտավարական մեխանիզմով։ Մի կողմից կներդրվի ակտիվ աերոդինամիկա, որի շնորհիվ բոլիդի թևերը կկարողանան փոխել իրենց անկյունը՝ նվազեցնելով օդի դիմադրությունը 55%-ով և ապահովելով կայունություն շրջադարձերում։ Մյուս կողմից՝ վարորդները կստանան Manual Override հնարավորություն․ երբ նրանք մեկ վայրկյանից պակաս հեռավորության վրա լինեն առջևի բոլիդից, կկարողանան ժամանակավորապես ակտիվացնել մարտկոցի լրացուցիչ էներգիան՝ վազանցն ավելի հեշտացնելու համար։ Այս նոր համակարգը կվերացնի վազանցի «գոտիները» և վարորդին կտա մրցուղու ցանկացած հատվածում գրոհելու ազատություն։

2026 թվականին Ֆորմուլա 1-ը պատրաստվում է անցնել մի տեխնիկական հեղափոխության, որը գործնականում «զրոյացնում է» բոլոր թիմերի մինչև այդ ունեցած առավելությունները։ Այս փոփոխություններն այնքան արմատական են, որ անհնար է տալ հստակ կանխատեսումներ, սակայն փորձագիտական վերլուծությունը թույլ է տալիս առանձնացնել այն թիմերին, որոնք ունեն նոր դարաշրջանի ֆավորիտները դառնալու առավելագույն պոտենցիալը։

«Մերսեդեսը» համարվում է գլխավոր ֆավորիտներից շնորհիվ իր պատմական փորձի. 2014թ.՝ հիբրիդային դարաշրջանի սկզբում, նրանց դոմինանտությունը ապացուցեց, որ նրանք ունեն ֆանտաստիկ ինժեներական ռեսուրսներ, հատկապես էլեկտրական համակարգերի և էներգիայի վերականգնման ոլորտում։ «Ֆերարին» ևս մեծ հույսեր ունի, քանի որ լինելով մեկն այն քիչ թիմերից, որը շարունակում է շասին և շարժիչը մշակել միասնական համակարգով՝ «Սկուդերիան» կկարողանա ապահովել երկու բաղադրիչների առավելագույն ինտեգրումը, ինչը կենսական նշանակություն ունի նոր կանոնների ներքո։

«Ռեդ Բուլի» դեպքում իրավիճակն ավելի ռիսկային է։ Չնայած նրանք հայտնի են աշխարհի լավագույն շասիներ նախագծելու իրենց ունակությամբ, 2026թ. նրանք առաջին անգամ ամբողջությամբ կօգտագործեն իրենց կողմից մշակված Red Bull Powertrains շարժիչը։ Պատմությունը ցույց է տվել, որ նոր շարժիչ արտադրողները սկզբում դժվարանում են, և եթե RBPT-ի շարժիչը թերարտադրող լինի, թիմի աերոդինամիկ առավելությունները կարող են չեզոքացվել։

Ինչ վերաբերում է «Մաքլարենին», ապա բրիտանական կոնցեռնը վատագույններից է եղել հիբրիդային ժամանակաշրջանում, բայց հիմա թիմն ունի մշակած տվյալներ, որոնք նրանց կարող են օգնել հաջորդ տարվա համար։ Դժվար է պատկերացնել, որ «Մաքլարենը» կպահպանի դոմինանտությունը։ Միևնույն ժամանակ, նորեկ «Աուդին», որը մտնում է սպորտ շնորհիվ MGU-H բարդ համակարգի հեռացման, ունի անսահմանափակ ռեսուրսներ և կարող է անակնկալ մատուցել, քանի որ կանոնների «զրոյացումը» բոլորին դնում են հավասար պայմաններում։

Մրցավազքի ելքը պայմանավորված կլինի ոչ միայն հզորությամբ, այլև ինժեներների և վարորդների մարտավարական որոշումներով։ Էլեկտրական բաղադրիչի մեծացման պատճառով էներգիայի կառավարումը կդառնա հիմնական մարտահրավեր. վարորդները պետք է խելացիորեն պահեն և օգտագործեն մարտկոցի լիցքը՝ խուսափելու համար ուղղահայացներում հզորության կորստից։

Այսպիսով՝ 2026 թվականը կլինի Ֆորմուլա 1-ի ամենաանորոշ տարիներից։ Ֆավորիտը կլինի այն թիմը, որը կկարողանա առաջինը գտնել ճիշտ հավասարակշռությունը նոր հիբրիդային շարժիչի, ագրեսիվ շասիի և էներգիայի խելացի կառավարման միջև։

Մի դարաշրջան, որը վերականգնում է մրցակցությունը և դարձնում սպորտը տեխնոլոգիապես ավելի մոտ ապագային...