Անգլիայի գավաթի խաղարկության 1/32 եզրափակիչում «Մանչեսթեր Յունայթեդը» «Էմիրեյթս» ստադիոնում հետխաղյա 11-մետրանոցներով հաղթեց Լոնդոնի «Արսենալին»։
Հանդիպման հիմնական ժամանակում կողմերը խփեցին մեկական գնդակ։ 52-րդ րոպեին մանկունիական ակումբից հաշիվը բացեց թիմի ավագ, պորտուգալացի կիսապաշտպան Բրունու Ֆեռնանդեշը: «Զինագործները» 63-րդ րոպեին պատասխանեցին բրազիլացի պաշտպան Գաբրիելի գոլով։
Նախքան մրցակցի պատասխան գոլը «Յունայթեդը» մնաց 10 ֆուտբոլիստով. 61-րդ րոպեին դաշտից հեռացվեց պորտուգալացի պաշտպան Դիոգու Դալոն։
72-րդ րոպեին տանտերերը կարող էին առաջ անցնել հաշվի մեջ, սակայն 11-մետրանոցից չկարողացավ աչքի ընկնել նորվեգացի կիսապաշտպան Մարտին Էդեգորը։ «Արսենալի» ավագը կարիերայում առաջին անգամ չկարողացավ իրացնել 11-մետրանոցը, հայտնում է Squawka-ն։ Այդ դրվագում հյուրերին փրկեց դարպասապահ Ալթայ Բայինդիրը։
BAYINDIR DENIES ODEGAARD FROM THE SPOT😱@ManUtd #EmiratesFACup pic.twitter.com/2jxVD2tn5S
— Emirates FA Cup (@EmiratesFACup) January 12, 2025
26-ամյա դարպասապահը հետխաղյա 11-մետրանոց հարվածաշարի ժամանակ հետ մղեց նաև «Արսենալի» գերմանացի հարձակվող Կայ Հավերցի հարվածը։
«Մանչեսթեր Յունայթեդն» Անգլիայի գավաթի տիտղոսի պաշտպանությունն սկսեց հաղթանակով և դուրս եկավ մրցաշարի 1/16 եզրափակիչ։
Անգլիայի գավաթ, 1/32 եզրափակիչ
«Արսենալ» - «Մանչեսթեր Յունայթեդ»` 1-1 (11-մետրանոցներով` 3-5)
Գաբրիել, 63 - Բրունու Ֆեռնանդեշ, 52
Հեռացում` Դիոգու Դալո, 61 («Մանչեսթեր Յունայթեդ»)
Չիրացված 11-մետրանոց` Մարտին Էդեգոր, 72 («Արսենալ»)
