Աշխարհի առաջին ռակետ Կառլոս Ալկարասը հույս է հայտնել, որ կհասնի «Մեծ սաղավարտի» տարվա երրորդ մրցաշար «Ուիմբլդոնի» եզրափակիչ ու այնտեղ կխաղա մրցաշարի գործող հաղթող, սերբ թենիսիստ Նովակ Ջոկովիչի հետ (երկրորդ ռակետ):
«Հույս ունեմ, որ Ջոկովիչի հետ կխաղամ «Ուիմբլդոնի» եզրափակիչում: Ջոկովիչին դիմադրելն ամենաբարդ խնդիրն է:
Նովակն ամեն ինչ շատ հեշտ է դարձնում։ Նա շատ լավ է շարժվում, դիպուկ հարվածում է գնդակին: Նրա խաղն ամեն ինչի խառնուրդ է: Ես կասեի, որ նա ոչ մի սխալ բան չի անում: Նրա խաղում շատ դժվար է որևէ թույլ կողմ գտնելը»,- իսպանացու խոսքը մեջբերում է Tennis 365-ը։
Հիշեցնենք, որ 20-ամյա Ալկարասը հուլիսի 4-ին «Ուիմբլդոնի» առաջին շրջանում կմրցի ֆրանսիացի թենիսիստ Ժերեմի Շարդիի հետ:
