Ֆուտբոլի Հայաստանի ազգային հավաքականի հարձակվող Արթուր Միրանյանը և գլխավոր մարզիչ Ալեքսանդր Պետրակովը Սլովենիայի թիմի դեմ ընկերական հանդիպման նախախաղային ասուլիսին Լյուբլյանայում պատասխանել են լրագրողների հարցերին:
Արթուր Միրանյանը՝ մրցակցի և խաղի մասին:
«Վերլուծել ենք մրցակցին, կարող եմ ասել, որ բավականին ուժեղ մրցակից է, սակայն ունի ինչպես ուժեղ, այնպես էլ թույլ կողմեր: Կփորձենք վաղն օգտագործել նրանց թույլ կողմերը»:
Ալեքսանդր Պետրակովը՝ խաղին պատրաստվելու և ակնկալիքների մասին:
«Դիտել ենք Սլովենիայի հավաքականի խաղերը, գիտենք, որ լավ թիմ ունեն, շատ արժանիորեն դուրս են եկել Եվրոպայի առաջնության հիմնական փուլ:
Մենք լավ հավաք ենք անցկացրել, չունեմ որևէ դժգոհություն տղաներից, նրանք կատարել են իրենց առջև դրված խնդիրները:
Մեր նպատակը լավ ֆուտբոլ ցուցադրելն է, լավ ստուգողական խաղ անցկացնելը: Լավ հնարավորություն է փորձարկելու ֆուտբոլիստներին, ստուգելու նրանց պատրաստվածությունը Ազգերի լիգայի սեպտեմբերյան խաղերից առաջ»:
Սլովենիա - Հայաստան հանդիպումը տեղի կունենա հունիսի 4-ին, կմեկնարկի Երևանի ժամանակով 20:00-ին և կցուցադրվի Fast Sports հեռուստաալիքի ուղիղ եթերում:
Հայաստանի հավաքականն այս հանդիպումից երեք օր անց էլ Երևանի Վազգեն Սարգսյանի անվան «Հանրապետական» ստադիոնում ընկերական խաղ կանցկացնի Ղազախստանի թիմի դեմ:
