VNews.am-ը շարունակում է VBET Հայաստանի Պրեմիեր լիգայի 30-րդ առաջնության աշնանային հատվածում թիմերի ելույթների ամփոփումը: Այսօր կանդրադառնանք  «Ալաշկերտին»:  

1. «Ալաշկերտն»  առաջնության աշնանային հատվածն ավարտեց 5-րդ հորիզոնականում՝ 13 հանդիպումներում վաստակելով 21 միավոր (+6=3-4, 17-13), ինչը հնարավոր միավորների 53,8 տոկոսն է: «Սևանի» հետ չեղարկված խաղում գրանցվել էր գոլազուրկ ոչ-ոքի:

Նախորդ առաջնության նույն ժամանակահատվածի համեմատ «Ալաշկերտը»  4  միավոր պակաս է վաստակել: Հիշեցնենք, որ 2020/21թթ. առաջնության մեկնարկային 13 հանդիպումներում ալաշկերտցիները 25 միավոր էին վաստակել (+7=4-2, 15-10), ինչը հնարավոր միավորների 64,1 տոկոսն էր:

Առաջնության աշնանային հատվածում «Ալաշկերտը»  հանդես եկավ 3 մարզիչների գլխավորությամբ: Մեկնարկային 3 խաղերում թիմի գլխավոր մարզիչն Ալեքսանդր Գրիգորյանն էր, որի օրոք ալաշկերտցիները միավոր չվաստակեցին:

Հաջորդ երկու տուրերում «Նորավանքի» (0-0) և ԲԿՄԱ-ի (2-1) հետ անցկացրած խաղերում թիմի գործողությունները ղեկավարում էր Սերգեյ Էրզրումյանը:

Իսկ առաջնության աշնանային հատվածի վերջին 8 հանդիպումներում գլխավոր մարզիչը սերբ Միլան Միլանովիչն էր, որն արդեն թիմում չէ: Նրա օրոք «Ալաշկերտը» 17 միավոր վաստակեց (+5=2-1, 13-4, ինչը հնարավոր միավորների 70,8 տոկոսն է:

2. «Ալաշկերտը»  սեփական դաշտում անցկացրած 7 հանդիպումներում վաստակեց հնարավոր միավորների 52,3 տոկոսը (+3=2-2, 5-7): Սեփական հարկի տակ ալաշկերտցիները պարտվել են «Արարատ-Արմենիային» (0-3) և «Վանին» (0-2):

Հյուրընկալվելիս անցկացրած 6 հանդիպումներում «Ալաշկերտի» օգտին գրանցվեց 10 միավոր (+3=1-2, 12-6), ինչը հնարավոր միավորների 55,5 տոկոսն է: Մրցակցի հարկի տակ ալաշկերտցիները հաղթել են «Վանին» (4-0), «Նորավանքին» (2-0) և ԲԿՄԱ-ին (2-0):

3. «Ալաշկերտի»  մեկնարկն ամենաանհաջողն էր թիմի պատմության մեջ: Ալեքսանդր Գրիգորյանի գլխավորությամբ ալաշկերտցիներն առաջնությունը սկսեցին 3 անընդմեջ պարտությամբ («Արարատ-Արմենիա»՝ 0-3, «Վան»՝ 0-2, «Արարատ»՝ 2-3): Միայն 4-րդ խաղում՝ «Նորավանքի» հետ մրցավեճում ալաշկերտցիներն առաջին միավորը վաստակեցին՝  հանդիպումն ավարտելով գոլազուրկ ոչ-ոքի:

Առաջին անգամ «Ալաշկերտը» մեկնարկային երկու հանդիպումներում էլ չգտավ մրցակիցների դարպասի բանալին: Միայն 5-րդ խաղում ալաշկերտցիներն առաջնությունում առաջին հաղթանակը տոնեցին՝ 2-1 հաշվով առավելության հասնելով ԲԿՄԱ-ի նկատմամբ: Ավելի վատ արդյունք թիմի պատմության մեջ գրանցվել էր միայն Բարձրագույն խմբում նորամուտի մրցաշրջանում (2013/14թթ.՝ 10 խաղ):

Իսկ ահա Միլան Միլանովիչի օրոք «Ալաշկերտն» առաջնության վերջին 5 խաղերում հաղթել է, 3 խաղ անընդմեջ դարպասն անառիկ է պահել:

13 հանդիպումներից 4-ում «Ալաշկերտին»  չհաջողվեց գրավել մրցակիցների դարպասը: 6 խաղում էլ «Ալաշկերտի» դարպասն անառիկ մնաց:

«Ալաշկերտը»  խոշոր հաշվով հաղթեց «Վանին» (4-0), պարտվեց «Արարատ-Արմենիային» (0-3):   

4. «Ալաշկերտի»  մասնակցությամբ հանդիպումներում նշանակվել է 11մ ընդամենը 3 հարված, որից իրացվել է 2-ը: Թիմի օգտին նշանակված միակ հարվածը դիպուկ է իրացրել Ժոզե Էմբալուն՝ գրավելով արարատցի Վսևոլոդ Երմակովի պաշտպանած դարպասը:

«Ալաշկերտի»  դարպասին նշանակված 11մ 2 հարվածներից մեկը հետ է մղել Օգնյեն Չանչարևիչը՝  հաղթող դուրս գալով արարատցի Սերժ Դեբլեի հետ մենամարտում: Իսկ փյունիկցի Էրիկ Վարդանյանը խոցել է Չանչարևիչի պաշտպանած դարպասը:

5. Առաջնության աշնանային հատվածում խփած 17 գոլերի հեղինակներ դարձան 10 ալաշկերտցիներ: Դավիթ Խուրցիձեն, Ժոզե Էմբալուն, Իսմայել Ֆոֆանա Բեկոն, Միհայլո Յովանովիչը, Դեու Դոսա Օլատունջին և Մարկո Միլինկովիչը բացեցին գոլերի հաշիվն «Ալաշկերտում»:

Առավել արդյունավետ գործեցին 3-ական գոլի հեղինակ դարձած Դավիթ Խուրցիձեն, Ժոզե Էմբալուն և Իսմայել Ֆոֆանա Բեկոն, որոնք ընդգրկվեցին թիմի լեգեոնական ռմբարկուների տասնյակում:

Մարկո Միլինկովիչը (33 տարեկան 206 օրական), Իսմայել Ֆոֆանա Բեկոն (33 տարեկան 87 օրական) և Միհայլո Յովանովիչն (32 տարեկան 258 օրական) ընդգրկվեցին VBET ՀՊԼ-ում «Ալաշկերտում» գոլ խփած ամենատարեց ֆուտբոլիստների տասնյակում: Այդ ցանկից դուրս մնացին Արթուր Եդիգարյանը (31 տարեկան 277 օրական), Նարեկ Բեգլարյանն (31 տարեկան 272 օրական) ու Մլադեն Զելկովիչը (31 տարեկան 108 օրական):

6. Մեկ գոլ խփած Ալեքսանդր Գլիշիչը 15 գնդակով եզրափակեց «Ալաշկերտի» ամենաարդյունավետ լեգեոնականների եռյակը՝ իրենից առաջ թողնելով Ուրոշ Նենադովիչին (18 գոլ) և Հեբեր Արաուխոյին (16): Իսկ ահա պաշտոնական մրցումներում «Ալաշկերտում» խփած 22 գոլով Գլիշիչը հավասարվեց թիմի ամենաարդյունավետ լեգեոնական Ուրոշ Նենադովիչին:

Ժոզե Էմբալուն (8 գոլ) և Դավիթ Խուրցիձեն (5) ընդգրկվեցին պաշտոնական մրցումներում «Ալաշկերտում» գոլ խփած ամենաարդյունավետ լեգեոնականների տասնյակում:

Դեու Դոսա Օլատունջին էլ (23 տարեկան 102 օրական), ընդգրկվեց VBET ՀՊԼ-ում «Ալաշկերտում» գոլ խփած ամենաերիտասարդ լեգեոնականների տասնյակում՝ ցանկից դուրս մղելով Վիկտոր Շիշկովին (26 տարեկան 345 օրական):

7. Առաջնության աշնանային հատվածում «Ալաշկերտի» դարպասը պաշտպանեցին երկու դարպասապահներ: Օգնյեն Չանչարևիչն անցկացրած 7 խաղերում 6 գոլ բաց թողեց (միջինը մեկ խաղում՝ 0,85 գոլ), 4 անգամ դարպասն անառիկ պահեց:

32-ամյա Չանչարևիչը  418 րոպե շարունակ դարպասն անառիկ պահեց և գերազանցեց «Արարատ-Արմենիայի» դարպասապահ Դմիտրի Աբակումովի տարիքային ռեկորդը: Վերջինս այդ տարիքում ՀՀ առաջնություններում հանդես եկած այլազգի դարպասապահներից առավել երկար՝ 324 րոպե շարունակ գոլ բաց չէր թողել:

Դավիթ Յուրչենկոն թիմի դարպասը պաշտպանեց 6 խաղերում, որոնցում 7 գոլ բաց թողեց (միջինը մեկ խաղում՝ 1,16 գոլ), 2 անգամ դարպասն անառիկ պահեց:

8. Որոշ ընդմիջումից հետո կրկին «Ալաշկերտի» մարզաշապիկը կրած Արտակ Եդիգարյանը թիմի կազմում VBET ՀՊԼ-ում անցկացրած խաղերի քանակով (118) եզրափակեց ամենափորձառու ֆուտբոլիստների եռյակը: Ցանկը 156 խաղով գլխավորում է «Ալաշկերտի» ռեկորդակիր Արտակ Գրիգորյանը, որին հաջորդում է Միհրան Մանասյանը (139 խաղ): Իսկ ահա «Ալաշկերտում» խփած գոլերի քանակով (33) Եդիգարյանը զիջում է միայն թիմի պատմության լավագույն ռմբարկու Միհրան Մանասյանին, որի հաշվին 67 գոլ է գրանցված:

31-ամյա Եդիգարյանը թիմի կազմում անցկացրած խաղերի քանակով տարիքային նոր ռեկորդ սահմանեց: Մինչ այդ 31տարեկանում «Ալաշկերտում» բոլորից շատ խաղ էր անցկացրել Գագիկ Դաղբաշյանը (114):

9. Առաջնության աշնանային հատվածում «Ալաշկերտի» ամենատարեց ֆուտբոլիստները 35-ամյա Դավիթ Յուրչենկոն և Եվգենի Յատչենկոն էին: Վերջինս  (35 տարեկան 109 օրական), Մարկո Միլինկովիչը (33 տարեկան 240 օրական) և Իսմայել Ֆոֆանա Բեկոն (33 տարեկան 95 օրական) ընդգրկվեցին VBET ՀՊԼ-ում «Ալաշկերտում» հանդես եկած ամենատարեց ֆուտբոլիստների տասնյակում՝ ցանկից դուրս մղելով Սամվել Մելքոնյանին (32 տարեկան 250 օրական), Հրայր Մկոյանին (32 տարեկան 237 օրական) և Խորեն Վերանյանին (32 տարեկան 236 օրական):

21-ամյա Էրիկ Սողոմոնյանն ու Արտյոմ Գյուրջյանն առաջնության աշնանային հատվածում «Ալաշկերտում» հանդես եկած ամենաերիտասարդ ֆուտբոլիստներն են:

Բարձրագույն խմբի առաջնություններում անցկացրած խաղերի ընդհանուր քանակով (322) «Ալաշկերտի» ամենափորձառու ֆուտբոլիստը թիմի 34-ամյա ավագ Արտակ Գրիգորյանն է: Այդ ցուցանիշով Արտակը նաև ընթացիկ առաջնության մասնակից ֆուտբոլիստներից ամենափորձառուն է: ՀՀ առաջնությունների ամենափորձառու ֆուտբոլիստների ցանկում Գրիգորյանը շրջանցեց Կարեն Սիմոնյանին (314 խաղ), Նորայր Գրիգորյանին (319) և Արտյոմ Ադամյանին (320) ու զբաղեցրեց 9-րդ հորիզոնականը: Ցանկը գլխավորում է «Շիրակի» նախկին ավագ Հովհաննես Թահմազյանը, որը մասնակցել է 461 խաղի:

Նոյեմբերի 8-ին «Ուրարտուի» հետ կայացած հանդիպումն Արտակ Գրիգորյանի կարիերայում հոբելյանական՝ 450-րդ խաղն էր պաշտոնական մրցումներում: Իսկ մինչ այդ՝ սեպտեմբերի 27-ին ԲԿՄԱ-ի հետ մրցավեճում Գրիգորյանը նշել էր 200-րդ խաղի հոբելյանը պաշտոնական մրցումներում «Ալաշկերտի» կազմում:

10. Առաջնության աշնանային հատվածի 14 հանդիպումներում (ներառյալ «Սևանի» հետ չեղարկված խաղը) «Ալաշկերտի»  կազմում խաղադաշտ դուրս եկան 31 ֆուտբոլիստներ, որոնցից 22-ը լեգեոնականներ էին:  Երկու ցուցանիշներով էլ «Ալաշկերտն»  առաջնության մասնակից թիմերի մեջ յուրօրինակ ռեկորդակիրն է: 13 ֆուտբոլիստներ՝  Դավիթ Խուրցիձեն, Վլադիսլավ Կրյուչկովը, Խամես Սանթոս դաս Նևեսը, Ժոզե Էմբալուն, Աղվան Դավոյանը, Դեու Դոսա Օլատունջին, Լուկաս Սերան, Իսմայել Ֆոֆանա Բեկոն,  Մարկո Միլինկովիչը, Մաթեուս Ալեսանդրո Պերեյրան, Եվգենի Յատչենկոն, Նիքսոն Կարդոսոն  և Արտյոմ Գյուրջյանն առաջնության աշնանային հատվածում նորամուտը նշեցին «Ալաշկերտում»:

Ալաշկերտցիներն առաջնության հանդիպումներում 32 անգամ զգուշացվել են: Առավել հաճախ՝ 5 անգամ դեղին քարտի է արժանացել Ալեքսանդր Գլիշիչը:

VNews.am-ը ներկայացնում է «Ալաշկերտի»  ֆուտբոլիստների ցուցանիշներն ընթացիկ առաջնության աշնանային հատվածում (ներառյալ «Սևանի» հետ չեղարկված խաղը):

Ֆուտբոլիստներ	Խաղ	Գոլ	Զ (Հ)
1. Դավիթ Խուրցիձե	14	3	1
2. Ռումյան Հովսեփյան	12	-	-
3. Վանգու Գոմե	12	-	1
4. Ժոզե Էմբալու	11	3	2
4. Դիդիե Բորիս Կադիո	11	-	2
5. Արտակ Գրիգորյան	11	-	1
6. Վլադիսլավ Կրյուչկով	11	-	2
8. Իսմայել Ֆոֆանա Բեկո	10	3	-
9. Ալեքսանդր Գլիշիչ	10	1	5
10. Խավես Սանթոս դաս Նևես	10	-	2
11. Վենսան Բեզեկուր	10	-	-
12. Տարոն Ոսկանյան	9	1	2
13. Արտակ Եդիգարյան	9	1	2
14. Մարկո Միլինկովիչ	8	2	1
15. Օգնյեն Չանչարևիչ	8	-  6	1
16. Տիագո Կոելյո	8	-	1
17. Նիկիտա Տանկով	7	1	2
18. Աղվան Պապիկյան	7	-	-
19. Եվգենի Յատչենկո	7	-	1
20. Դավիթ Յուրչենկո	6	- 7	-
21. Դեու Դոսա Օլատունջի	5	1	2
22. Դեյան Բոլևիչ	5	-	-
23. Բրանկո Միհայլովիչ	5	-	-
24. Աղվան Դավոյան	4	-	1
25. Միհայլո Յովանովիչ	3	1	2
26. Գրիգոր Աղեկյան	3	-	-
27. Էրիկ Սողոմոնյան	2	-	1
28. Նիքսոն Կարդոսո	2	-	-
29. Լուկաս Սերա	1	-	-
30. Մաթեուս Ալեսանդրո Պերեյրա	1	-	-
31. Արտյոմ Գյուրջյան	1	-	-