Անգլիական «Ասթոն Վիլայի» վինգեր Մուսա Դիաբին կարիերան կշարունակի Սաուդյան Արաբիան ներկայացնող «Ալ Իթիհադում»։

Ինսայդեր Ֆաբրիցիո Ռոմանոն փոխանցում է, որ սաուդյան ակումբը համաձայնեցրել է ֆուտբոլիստի տրանսֆերը և «Ասթոն Վիլային» կվճարի 60 միլիոն եվրո։ Ֆրանսիացի եզրային հարձակվողը նոր ակումբի հետ կնքելու է 5 տարվա պայմանագիր։

«Ասթոն Վիլան» նախորդ ամռանն էր ակումբի համար ռեկորդային` 55 միլիոն եվրոյով Լևերկուզենի «Բայերից» գնել Դիաբիի տրանսֆերը։ Նա Բիրմինգհեմը ներկայացնող ակումբում 54 խաղում դարձել է 10 գոլի ու 9 գոլային փոխանցման հեղինակ։

Հիշեցնենք, որ «Ալ Իթիհադում» են խաղում նաև «Ոսկե գնդակի» դափնեկիր, Մադրիդի «Ռեալի» նախկին հարձակվող Կարիմ Բենզեման ու Ֆրանսիայի ազգային հավաքականի կիսապաշտպան Նգոլո Կանտեն։