VNews-ը նախորդ անգամ ներկայացրել էր այն հայ ֆուտբոլիստների ցանկը, որոնք Fastex Հայաստանի Պրեմիեր լիգայում խաղացել են 9 և ավելի թիմերում: Յուրօրինակ ռեկորդակիրը Հայկ Նարիմանյանն է, որը ֆուտբոլային կարիերայի ընթացքում պաշտպանել է հայկական 13 ակումբի մարզական պատիվը: Իսկ ընթացիկ առաջնության մասնակիցներից ակումբային գրանցումն առավել հաճախ փոխել է «Փյունիկի» 35-ամյա պաշտպան Արթուր Ավագյանը, որը խաղացել է 10 թիմում:

Այսօր կանդրադառնանք լեգեոնականներին: Նրանց մեծամասնությունը Հայաստանի առաջնություններում առավելագույնը մի քանի մրցաշրջան է անցկացրել: Միևնույն ժամանակ մի խումբ այլազգի ֆուտբոլիստներ բավական երկար են մնացել Հայաստանում, իսկ նրանց մի մասը նույնիսկ հասցրել է խաղալ 3 և ավելի հայկական թիմերում:

Հայաստանի առաջնություններում առավել երկար՝ 9 մրցաշրջան խաղացել են բրազիլացի Ալեքս Էնրիկե դա Սիլվան և Ռուսաստանում ծնված Անատոլի Այվազովը: Եթե բրազիլացի պաշտպանը մինչև վերջ հավատարիմ է մնացել «Միկային»՝ իր համար հարազատ դարձած թիմի մարզաշապիկով խաղադաշտ դուրս գալով 2006-2015 թվականներին, ապա 26-ամյա դարպասապահը հասցրել է պաշտպանել 4 թիմերի դարպասը: Ընդ որում, Ալեքս Էնրիկե դա Սիլվան Fastex ՀՊԼ-ում ամենաշատ խաղ (230) անցկացրած լեգեոնականն է:

Անատոլի Այվազովը Հայաստանում ֆուտբոլային կարիերան սկսել է «Փյունիկում»՝ նորամուտը նշելով 2014թ. սեպտեմբերի 13-ին «Արարատի» հետ կայացած 5-րդ տուրի խաղում: Նորամուտը հաջող ստացվեց: 18-ամյա դարպասապահը դարպասն անառիկ պահեց, իսկ նրա թիմակիցները 4 գոլ խփեցին: 

«Փյունիկի» նորեկը միանգամից դարձավ թիմի հիմնական դարպասապահը և մինչև առաջնության ավարտն առանց փոխարինման պաշտպանեց դարպասը՝ անցկացրած 24 հանդիպումներում բաց թողնելով նույնքան գնդակ: Այդ խաղերից 10-ում նա դարպասն անառիկ պահեց: 

«Փյունիկի» կազմում անցկացրած առաջին մրցաշրջանը շատ հաջող էր Այվազովի համար, որը թիմակիցների հետ նվաճեց Հայաստանի չեմպիոնի և գավաթակրի տիտղոսները: Հաջորդ մրցաշրջանում Այվազովը «Փյունիկում» դարձավ Հայաստանի սուպերգավաթակիր և առաջնության բրոնզե մրցանակակիր՝ 12 խաղում բաց թողնելով 11 գնդակ, 4 անգամ դարպասը պահելով անառիկ: 

Մրցաշրջանի ավարտից հետո տեղափոխվելով «Շիրակ»՝ Անատոլի Այվազովը երկու մրցաշրջան հուսալիորեն պաշտպանեց գյումրեցիների դարպասը: «Շիրակում» ռուսաստանցի դարպասապահը թիմակիցների հետ դարձավ Հայաստանի գավաթակիր ու սուպերգավաթակիր, արժանացավ բրոնզե մեդալի:

Այնուհետև 3 մրցաշրջան Այվազովը խաղաց «Ուրարտուի» կազմում: Այնտեղ էլ նա առանց պարգևների չմնաց՝ 2 անգամ դառնալով բրոնզե մեդալակիր:

Ընթացիկ առաջնությունն Այվազովը սկսեց «Նոայում», որը նրա համար արդեն հայկական 4-րդ ակումբն էր: Վերջերս 26-ամյա դարպասապահը հեռացել էր «Նոայից» և առայժմ հայտնի չէ, թե որտեղ կշարունակի կարիերան:

Թիմից թիմ տեղափոխությունների քանակով լեգեոնականների մեջ ռեկորդակիրը նիգերիացի Սոլոմոն Իմե Ուդոն է, որը Fastex ՀՊԼ-ում անցկացրած 8 մրցաշրջանների ընթացքում հասցրել է խաղալ 5 թիմերիում:

Նիգերիացի կիսապաշտպանը Հայաստանում հայտնվեց 2015թ. ամռանը՝ ընդգրկվելով նախորդ առաջնության արծաթե մեդալակիր «Ուլիսի» կազմում: Սակայն առաջնության աշնանային հատվածի ավարտից հետո «Ուլիսը» լուծարվեց, որի պատճառով Ուդոն գարնանը ելույթները շարունակեց «Շիրակում»: 

Գյումրեցիների կազմում 2,5 մրցաշրջան խաղալու ընթացքում նիգերիացի ֆուտբոլիստը թիմակիցների հետ դարձավ Հայաստանի գավաթակիր ու սուպերգավաթակիր, մեկական անգամ էլ արժանացավ արծաթե և բրոնզե մեդալների:

Հաջորդ մրցաշրջանում Ուդոն տեղափոխվեց «Ուրարտու», որի կազմում իր երկրորդ բրոնզե մեդալը նվաճեց և առաջնության ավարտից հետո վերադարձավ «Շիրակ»: 2020/21թթ. առաջնությունը Հայաստանի հավաքականի կիսապաշտպանը շիրակցի իր մի խումբ թիմակիցների հետ դիմավորեց «Արարատում»: 

Այդ պահին Ուդոն Fastex ՀՊԼ-ում «Շիրակում» անցկացրած խաղերի քանակով (90) թիմում ելույթ ունեցած լեգեոնականների մեջ ռեկորդակիրն էր: Եվ միայն ընթացիկ առաջնության աշնանային հատվածում Մուսա Փոլ Բակայոկոյին հաջողվեց գերազանցել Ուդոյի ռեկորդային ցուցանիշը՝ «Շիրակում» անցկացրած խաղերի քանակը հասցնելով 92-ի: 

«Արարատում» մեկ մրցաշրջան խաղալուց հետո Ուդոն հրավիրվեց «Արարատ-Արմենիա», որի կազմում նախորդ մրցաշրջանում արժանացավ արծաթե մեդալի: Fastex ՀՊԼ-ում անցկացրած խաղերի ընդհանուր քանակով (168) Սոլոմոն Իմե Ուդոն եզրափակում է Հայաստանի առաջնությունների ամենափորձառու լեգեոնականների եռյակը՝ զիջելով միայն բրազիլացի Ալեքս Էնրիկե դա Սիլվային (230) և կոլումբացի Վբեյմար Անգուլոյին (174):

Ընթացիկ առաջնության մասնակից լեգեոնականներից ակումբային գրանցումը հաճախակի են փոփոխել նաև Դավիթ Խուրցիձեն, Ուրոշ Նենադովիչն ու Աննան Մենսահը, որոնք պաշտպանել են հայկական 4 ակումբների մարզական պատիվը: Ընդ որում, Նենադովիչն առաջնության գարնանային հատվածում որոշ ընդմիջումից հետո կրկին կխաղա «Ալաշկերտում»՝ թիմի կազմ վերադառնալով «Փյունիկից»: Սերբ հարձակվողը «Ալաշկերտում» խաղացել էր նաև 2016/17-2018/19թթ. մրցաշրջաններում:

Առաջնության գարնանային հատվածում հայկական 4 թիմերում խաղացած ֆուտբոլիստներին կմիանա «Ալաշկերտից» «Փյունիկ» տեղափոխված բրազիլացի Խամես Սանթոս Դաս Նևեսը: Նա Հայաստանում ֆուտբոլային կարիերան սկսել է 2019/20թթ. մրցաշրջանում՝ ելույթ ունենալով «Արարատում», ապա տեղափոխվել է «Ուրարտու», իսկ վերջին երկու առաջնություններում խաղում էր «Ալաշկերտում»:

VNews-ը ներկայացնում է այն լեգեոնականների ցանկը, որոնք Fastex ՀՊԼ-ում ելույթ են ունեցել 3 և ավելի թիմերում՝ նշելով Բարձրագույն խմբում անցկացրած խաղերի ընդհանուր քանակն ու ակումբը, որում առավել երկար է խաղացել: 

Ֆուտբոլիստներ	Թիմ	Խաղ	Ակումբ
1.Սոլոմոն Իմե Ուդո	5	168	«Շիրակ»՝ 90
2.Գագա Թբիլաշվիլի	4	165	«Գանձասար»՝ 81
3.Անատոլի Այվազով	4	126	«Շիրակ»՝ 56
4.Դավիթ Խուրցիձե	4	115	«Արարատ»՝ 48
5.Գորան Օբրադովիչ	4	113	«Գանձասար»՝ 83
6.Ուրոշ Նենադովիչ	4	112	«Ալաշկերտ»՝ 68
7.Էդվարդ Կպոդո	4	98	«Ուրարտու»՝ 56
8.Աննան Մենսահ	4	85	«Ուրարտու»՝ 26
9.Նոա Կասուլե	3	150	«Ուրարտու»՝ 79
10.Վսևոլոդ Երմակով	3	137	«Շիրակ»՝ 61
11.Դիդիե Բորիս Կադիո	3	133	«Ալաշկերտ»՝ 58
12.Ուգոչուկվու Իվու	3	122	«Ուրարտու»՝ 72
13.Ռենատո դե Մորայես	3	110	«Արարատ»՝ 92
14.Իսահ Ալիյու	3	95	«Արարատ»՝ 50
15.Նենադ Ռադաջա	3	91	«Ուրարտու»՝ 47
16.Իգոր Ստանոևիչ	3	89	«Շիրակ»՝ 40
17.Ուիլֆրեդ Կուասի Էզա	3	81	«Արարատ-Արմենիա»՝ 48
18.Խամես Սանթոս Դաս Նևես	3	77	«Ալաշկերտ»՝ 47
19.Ջուլիանո Հիմենես	3	75	«Իմպուլս»՝ 53
20.Դմիտրի Գուզ	3	70	«Արարատ-Արմենիա»՝45
21.Միլոշ Ստամենկովիչ	3	70	«Շիրակ»՝ 42
22.Ջուլիուս Դավիդ Ուֆուոմա	3	69	«Նորավանք»՝ 32
23.Ալեքսանդր Գլիշիչ	3	68	«Ալաշկերտ»՝ 48
24.Ալան Տատաև	3	62	«Նոա»՝ 41
25.Դրիսսա Դիարասուբա	3	62	«Շիրակ»՝ 38
26.Կոնստանտին Մանդրիչենկո	3	59	«Միկա»՝ 25
27.Սերժ Դեբլե	3	56	«Շիրակ»՝ 26
28.Դեու Դոսա Օլատունջի	3	55	«Լոռի»՝ 34
29.Ստեֆան Աջումանի	3	53	«Վան»՝ 29
30.Սանդի Ինուսա Ումարու	3	41	«Լոռի»՝ 21