Հայաստանի ազգային հավաքականի և «Արարատ-Արմենիայի» կիսապաշտպան Արթուր Սերոբյանը կարիերան կշարունակի Ռուսաստանի Պրեմիեր լիգայի ներկայացուցիչ «Կռիլյա Սովետովի» կազմում, հաղորդում է Fast Sports-ի մարզական մեկնաբան, ֆուտբոլային ինսայդեր Սուրեն Մելիքսեթյանը։
20-ամյա ֆուտբոլիստի ծառայություններով հետաքրքրված է նաև Սլովենիայի «Ցելյեն», սակայն կողմերը ֆինանսական առումով համաձայնության չեն հասել, և Սերոբյանը մեծ հավանականությամբ կմիանա Սամարան ներկայացնող ակումբին:
«Կռիլյա Սովետովը» հավանաբար կվարձակալի հայ ֆուտբոլիստին, իսկ կարճ ժամանակ հետո կգնի տրանսֆերային իրավունքը: Տրանսֆերի արժեքը կարող է կազմել 350-400 հազար եվրո: Սերոբյանի տրանսֆերով շահագրգռված է «Կռիլյա Սովետովի» գլխավոր մարզիչ Իգոր Օսինկինինը։
Հայ ֆուտբոլիստի ծառայություններով հետաքրքրված է նաև Շվեյցարիայի Սուպերլիգան ներկայացնող «Իվերդոնը»: Շվեյցարական ակումբը Սերոբյանին ցանկացել է ձեռք բերել նաև նախքան նրա՝ «Կասա Պիա» տեղափոխվելը: Այժմ նույնպես «Իվերդոնը» հետաքրքրված է Արթուրի ծառայություններով:
Հայաստանի Պրեմիեր լիգայի ավարտված մրցաշրջանում Արթուր Սերոբյանը մասնակցել է 17 հանդիպման ու դարձել 6 գոլի հեղինակ։ Կարիերայի ընթացքում նա խաղացել է նաև Երևանի ԲԿՄԱ-ում ու պորտուգալական «Կասա Պիայում»։ Հայաստանի հավաքականում կիսապաշտպանն անցկացրել է 16 հանդիպում։ Transfermarkt-ը 350 հազար եվրո է գնահատում նրա տրանսֆերային արժեքը։
