Առաջատար հավաքականները շարունակում են պատրաստվել ֆուտբոլի Եվրոպայի առաջնությանը։

Անգլիայի հավաքականը Լոնդոնի «Ուեմբլի» ստադիոնում ընկերական հանդիպում անցկացրեց Իսլանդիայի թիմի հետ և անակնկալ պարտություն կրեց 0-1 հաշվով։ Հանդիպման միակ գոլը 12-րդ րոպեին խփեց բելգիական «Հևերլի Լյովենի» կիսապաշտպան Յոն Դագյուր Տորստեյնսոնը։

Անգլիացիները վերջին հանդիպումն անցկացրին Եվրո-2024-ից առաջ։ Գարեթ Սաութգեյթի գլխավորած թիմը հունիսի 16-ին մրցաշարի առաջին տուրում մրցելու է Սերբիայի հավաքականի դեմ։

Գերմանիայի հավաքականը տնային Եվրոպայի առաջնությունից առաջ նույնպես վերջին հանդիպումն անցկացրեց և 2-1 հաշվով կամային հաղթանակ տարավ Հունաստանի նկատմամբ։

Պիրեյի «Օլիմպիակոսի» հարձակվող Գիորգիոս Մասուրասի խփած գոլին Բունդեսմանշաֆթը պատասխանեց Լոնդոնի «Արսենալի» հարձակվող Կայ Հարվերցի ու անգլիական «Բրայթոնի» կիսապաշտպան Պասկալ Գրոսի դիպուկ հարվածներով։

Գերմանացիները հունիսի 14-ին Եվրո-2024-ի բացման խաղում Մյունխենի «Ալիանց Արենա» ստադիոնում մրցելու են Շոտլանդիայի թիմի դեմ։

Լեհաստանի հավաքականն էլ տանը 3-1 հաշվով հաղթեց Ուկրաինային։ Տանտերերի հաղթական գոլերը խփեցին պաշտպան Սեբաստիան Վալյուկևիչը, կիսապաշտպաններ Պյոտր Զելինսկին ու Տարաս Ռոմանչուկը։ Ուկրաինացիներից աչքի ընկավ իսպանական Լա լիգայի 2023/24 մրցաշրջանի լավագույն ռմբարկու (24 գոլ), կատալոնական «Ժիրոնայի» հարձակվող Արտյոմ Դովբիկը։

Ընկերական խաղեր

Անգլիա - Իսլանդիա` 0-1 (տեսանյութ)

Յոն Դագյուր Տորստեյնսոն, 12

Գերմանիա - Հունաստան` 2-1 (տեսանյութ)

Կայ Հավերց, 56, Պասկալ Գրոս, 89 - Գիորգիոս Մասուրաս, 34

Լեհաստան - Ուկրաինա` 3-1 (տեսանյութ)

Սեբաստիան Վալյուկևիչ, 11, Պյոտր Զելինսկի, 16, Տարաս Ռոմանչուկ, 30 - Արտյոմ Դովբիկ, 41