Ուզբեկստանի մայրաքաղաք Տաշքենդում ընթացող բռնցքամարտի աշխարհի առաջնությունում Եվրոպայի եռակի չեմպիոն, Եվրոպական խաղերի հաղթող, Օլիմպիական խաղերի բրոնզե մեդալակիր, աշխարհի առաջնության եռակի բրոնզե մեդալակիր Հովհաննես Բաչկովը (63,5 կգ) տարավ երկրորդ հաղթանակը` դուրս գալով քառորդ եզրափակիչ:

Գյումեցի բռնցքամարտիկը 1/8 եզրափակիչում 5-0 հաշվով հաղթեց Թուրքիայի ներկայացուցիչ Հաքան Չանլիին:

Հիշեցնենք, որ Հովհաննես Բաչկովը մեկնարկել էր 1/16 եզրափակիչից, որտեղ միևնույն հաշվով առավելության էր հասել սերբ Սենդրիկ Ալեքսեյ Վիկտորովիչի նկատմամբ: 

Մայիսի 6-ին ռինգ դուրս կգա նաև Գուրգեն Մադոյանը (67 կգ), որը 1/8 եզրափակիչում ուժերը կչափի Տայպեի ներկայացուցիչ Յի Լիիի հետ:

Նախորդ օրերին Արթուր Ղազարյանը (60 կգ), Համբարձում Հակոբյանը (80 կգ), Բարեղամ Հարությունյանը (48 կգ), Ռուդոլֆ Գարբոյանը (51 կգ) և աշխարհի փոխչեմպիոն Դավիթ Չալոյանն (92+ կգ) պարտվել էին և դուրս մնացել պայքարից:

Արթուր Բազեյանը (57 կգ) , Ռաֆայել Հովհաննիսյանը (86 կգ), Նարեկ Մանասյանը (92 կգ) մեկնարկել էին հաղթանակով:

Հիշեցնենք, որ Կարեն Աղամալյանի գլխավորած հավաքականն աշխարհի առաջնությանը մասնակցում է 11 բռնցքամարտիկով:

Այս տարի աշխարհի առաջնության մրցանակային հիմնադրամը ռեկորդային 5,2 միլիոն դոլար է: Աշխարհի չեմպիոնները կստանան 200 հազար դոլար պարգևավճար, փոխչեմպիոնները՝ 100 հազար, իսկ բրոնզե մեդալակիրները՝ 50 հազար: