Համաշխարհային ֆուտբոլում մեծ պատվի են արժանանում ոչ միայն բազում տիտղոսներ նվաճած ֆուտբոլիստները, այլև նրանք, որոնք երկար տարիներ հավատարմորեն ծառայում են հարազատ ակումբին՝ վայելելով թիմի երկրպագուների սերն ու հարգանքը:

Հայաստանի առաջնությունների 33-ամյա պատմության ընթացքում ընդամենը 23 ֆուտբոլիստի է հաջողվել Բարձրագույն խմբում միևնույն թիմի կազմում 200 և ավելի խաղ անցկացնել ու ընդգրկվել ամենահավատարիմ ֆուտբոլիստների «200-ի ակումբում»: Դա վկայում է սահմանված նշաձողը հաղթահարելու բարդությունների մասին: Դրանք մի քանիսն են:

Հայաստանի առաջնություններում սովորաբար մեծ թիվ են կազմում թիմից թիմ ֆուտբոլիստների տեղափոխությունները, որի հետևանքով քչերն են երկար տարիներ ելույթներ ունենում միևնույն թիմում: Տեղափոխությունների մի մասն էլ հարկադրված է՝ պայմանավորված առաջնության մասնակից մի շարք թիմերի լուծարմամբ: Եվ վերջապես, ավելի հաջողակ ֆուտբոլիստներն իրենց կարիերայի ընթացքում մեկնել են Հայաստանից՝ հանդես գալով արտերկրի տարբեր ակումբներում:

Խորհրդանշական այդ ակումբում ընդգրկված են ընդամենը 7 թիմերի՝ «Շիրակի», «Փյունիկի», «Արարատի», «Արաքսի», «Միկայի», «Գանձասար-Կապանի» և «Ալաշկերտի» ներկայացուցիչներ: Մրցակցությունից դուրս է «Շիրակը», որի 14 ֆուտբոլիստներ են տեղ զբաղեցնում ցանկում: Դա վկայում է հարազատ ակումբին գյումրեցիների առանձնակի հավատարմության մասին:

Ընդհանրապես գյումրեցիները շատ հազվադեպ են այլ թիմեր տեղափոխվել: Միայն 2000-ականների կեսերին «Շիրակում» ֆինանսական վիճակի վատթարացումը ստիպեց գյումրեցիներից ոմանց ժամանակավորապես փոխելու ակումբային «գրանցումը»: Իսկ երբ վիճակը բարելավվեց, նրանք վերադարձան հարազատ կոլեկտիվ:

Պատահական չէ, որ «200-ի ակումբի» ցանկն էլ գլխավորում է ֆուտբոլային երկարակեցությամբ աչքի ընկած գյումրեցի Հովհաննես Թահմազյանը: ՀՀ առաջնություններում ռեկորդային թվով հանդիպումներ անցկացրած Թահմազյանը ռեկորդակիր է նաև միևնույն թիմում անցկացրած խաղերի քանակով: Բարձրագույն խմբի 461 հանդիպումներից 378-ը նա անցկացրել է հարազատ «Շիրակի» կազմում:

Հովհաննես Թահմազյանը միակ ֆուտբոլիստն է, որ մասնակցել է Հայաստանի առաջին 20 առաջնություններին: Միայն 3,5 մրցաշրջան է (2004-2007թթ. հունիս) նա բացակայել «Շիրակից»՝  հանդես գալով «Միկայում», որի կազմում բախտ է վիճակվել վայելելու նաև Հայաստանի գավաթը նվաճելու բերկրանքը, ինչը նրան մինչ այդ գյումրեցի իր թիմակիցների հետ չէր հաջողվել: «Շիրակում» հոբելյանական՝ 200-րդ հանդիպումը Թահմազյանն անցկացրել է 2000թ. հուլիսի 5-ին Գյումրիում «Կիլիկիայի» հետ կայացած մրցավեճում:

Իսկ առաջինը նրա թիմակից Արթուր Պետրոսյանն է ընդգրկվել ամենահավատարիմ ֆուտբոլիստների «200-ի ակումբում»՝ հոբելյանը նշելով 2000թ. հունիսի 24-ին Գյումրիում «Դինամոյի» հետ կայացած խաղում, որում դուբլի հեղինակ էր դարձել: Այդ մրցաշրջանը վերջինն էր Արթուր Պետրոսյանի համար «Շիրակում», որից հետո նա իր ֆուտբոլային կարիերան շարունակեց արտերկրում: Հակառակ դեպքում բացառված չէր, որ հենց Պետրոսյանը կարող էր գլխավորել «200-ի ակումբը»:

Արթուր Պետրոսյանը սակավաթիվ այն ֆուտբոլիստներից մեկն է, որ Հայաստանում իր ֆուտբոլային կարիերայի ընթացքում հանդես է եկել միայն մեկ թիմում: «200-ի ակումբի» անդամներից «Շիրակին» մինչև կարիերայի ավարտը հավատարիմ են մնացել նաև Գագիկ Մարգարյանը, Հենրիկ Բատիկյանն ու Հակոբ Արտոյանը: Կարեն Գ. Խաչատրյանն ու Անդրանիկ Բարիկյանը մինչև «Շիրակում» ընդգրկվելը, ֆուտբոլային կարիերան սկսել են «Շիրակ-2-ում», որի կազմում 1998թ. մասնակցել են Բարձրագույն խմբի առաջնությանը:

Ռայմոնդ Զադուրյանն էլ Բարձրագույն խմբում պաշտպանել է միայն «Շիրակի» դարպասը: Միայն մեկ մրցաշրջան` 2005թ. նա չի խաղացել շիրակցիների կազմում` պաշտպանելով Առաջին խմբում հանդես եկած  «Երևան Յունայթեդի» դարպասը:

Հարազատ ակումբին հավատարմության վառ օրինակ է նաև «Փյունիկի» բազմամյա նախկին ավագ Սարգիս Հովսեփյանը: Նա էլ Թահմազյանի պես ՀՀ անդրանիկ առաջնության մասնակից է, Հայաստանի առաջին չեմպիոններից մեկը, որին առաջինը բախտ վիճակվեց ճանաչվելու անկախ Հայաստանի լավագույն ֆուտբոլիստ:

Հայկական ֆուտբոլում նվաճած չեմպիոնական տիտղոսների քանակով (10) յուրօրինակ ռեկորդակիրը արտերկրում 6,5 մրցաշրջան անցկացնելուց հետո 2004թ. հուլիսին վերադարձավ «Փյունիկ», որի կազմում ելույթները շարունակեց մինչև 2012թ. աշուն: Հարազատ թիմի մարզաշապիկով Հովսեփյանը վերջին անգամ խաղադաշտ դուրս եկավ սեպտեմբերի 15-ին «Ուլիսի»  հետ առաջնության 21-րդ տուրի խաղում: Դա Հովսեփյանի  365-րդ հանդիպումն էր Բարձրագույն խմբում:

Այդ ցուցանիշով Սարգիս Հովսեփյանը մինչև օրս էլ «Փյունիկի» ռեկորդակիրն է: Նա «200-ի ակումբում» 2-րդ հորիզոնականն է զբաղեցնում: Եվ եթե Հովսեփյանը շարունակեր ելույթները գոնե մինչև 2012/13թթ. առաջնության ավարտը, որում թիմերը 42-ական խաղ պիտի անցկացնեին, ապա ներկայումս ինքը կգլխավորեր «200-ի ակումբը»:

Ամենահավատարիմ ֆուտբոլիստների ցանկում միակ լեգեոնականը «Միկայի» բրազիլացի ֆուտբոլիստ Ալեքս Էնրիկե դա Սիլվան է, որը թիմի կազմում 230 խաղ է անցկացրել: Այդ ցուցանիշով նա ոչ միայն «Միկայի» ռեկորդակիրն է, այլև լավագույնն է ՀՀ առաջնություններում հանդես եկած այլազգի ֆուտբոլիստների մեջ:

Հատկանշական է, որ ներկայումս ամենահավատարիմ ֆուտբոլիստների «200-ի ակումբում» գործող ոչ մի ֆուտբոլիստ չկա: Վերջինն Արտակ Գրիգորյանն էր, որը ֆուտբոլային կարիերան ավարտեց անցյալ տարվա դեկտեմբերին: Ի դեպ, Գրիգորյանն ակումբի շարքերը համալրած առայժմ վերջին ֆուտբոլիստն է:

Փորձառու ֆուտբոլիստի կարիերայում նշանակալի այդ իրադարձությունը տեղի է ունեցել 2023թ. ապրիլի 17-ին Fastex Պրեմիեր լիգայի 27-րդ տուրում «Փյունիկի» հետ մրցավեճում: «Ալաշկերտի» ավագը հարազատ թիմի մարզաշապիկով Հայաստանի առաջնություններում հոբելյանական՝ 200-րդ խաղն անցկացրեց: Արտակ Գրիգորյանը դարձավ այդ սահմանագիծը հատած առաջին ալաշկերտցին: Նա թիմի կազմում ՀՀ առաջնություններում անցկացրած 207 խաղով «Ալաշկերտի» ռեկորդակիրն է:

Իսկ ինչպիսի՞ն են «200-ի ակումբը» համալրելու հեռանկարները: Միանգամից նշենք, որ ներկայումս թիմերում աննախադեպ մեծ թվով լեգեոնականների առկայության պայմաններում պատկերը շատ տխուր է: Ընթացիկ առաջնության մասնակից թիմերից միայն 6-ում են ընդգրկված իրենց ներկայիս ակումբներում 100-ից ավելի խաղ անցկացրած ֆուտբոլիստներ, որոնց ընդհանուր թիվը 16 է:

Լավագույն դեպքում այդ ֆուտբոլիստներից միայն 4-ին՝ շիրակցի Հրայր Մկոյանին (164 խաղ), փյունիկցի Էդգար Մալաքյանին (163), «Ուրարտուի» կիսապաշտպան Կարեն Մելքոնյանին (159) և «Արարատ-Արմենիայի» ավագ Արմեն Համբարձումյանին (158) կարող է հաջողվել հաջորդ մրցաշրջանում համալրել «200-ի ակումբի» շարքերը:

FastNews-ը ներկայացնում է ամենահավատարիմ ֆուտբոլիստների «200-ի ակումբի» ցանկը:

Ֆուտբոլիստներ	Խաղ	Ակումբ	Թվական
1.Հովհաննես Թահմազյան	378	«Շիրակ»	1992-2003, 2007-2011
2.Սարգիս Հովսեփյան	365	«Փյունիկ»	1992-1997, 2004-2012
3.Գագիկ Մարգարյան	295	«Շիրակ»	1992-2005
4.Արարատ Հարությունյան	295	«Շիրակ»	1995-2004, 2007-2012
5.Տիգրան Դավթյան	285	«Շիրակ»	2000-2004, 2009-2015
6.Անդրանիկ Բարիկյան	274	«Շիրակ»	2001-2015
7.Ռայմոնդ Զադուրյան	264	«Շիրակ»	1992-2004, 2006-2008
8.Արթուր Հ. Մինասյան	248	«Արարատ»	1999-2002, 2004, 2006-09, 2011-13
9.Արա Խաչատրյան	246	«Գանձասար- Կապ.»	2008-2018
10.Կարեն Գ. Խաչատրյան	245	«Շիրակ»	1999-2011
11.Կարեն Ալեքսանյան	242	«Շիրակ»	1999-2003, 2011-2016
12.Գևորգ Հովհաննիսյան	241	«Շիրակ»	2005, 2007-2016
13.Ալեքս Էնրիկե դա Սիլվա	230	«Միկա»	2006-2015
14.Հենրիկ Բատիկյան	222	«Շիրակ»	1997-2009
15.Նորայր Հոխոյան	215	«Արաքս»	1993-2000, 2003
16.Արթուր Պետրոսյան	214	«Շիրակ»	1992-2000
17.Արթուր Յուզբաշյան	214	«Փյունիկ»	2007-2016
18.Աղվան Դավոյան	208	«Շիրակ»	2010-2021
19.Արսեն Ավետիսյան	208	«Փյունիկ»	1992-1998, 2006-2007
20.Արտակ Գրիգորյան	207	«Ալաշկերտ»	2015-2023
21.Ֆելիքս Խոջոյան	203	«Շիրակ»	1994-2000, 2007-2009
22.Գևորգ Պողոսյան	202	«Միկա»	2004, 2007-2015
23.Հակոբ Արտոյան	200	«Շիրակ»	1992-2000