Ֆուտբոլի լեգենդ Ռոնալդոն Մադրիդի «Ռեալում» իր նախկին թիմակից Թոմաս Գրավեսենին անվանել է վատագույնը, որի հետ երբևէ խաղացել է: Ռոմարիոյի հետ զրույցում Ռոնալդոն քննադատել է դանիացուն կոշտ խաղաոճի ու տեխնիկապես հմուտ չլինելու համար:
«Նա հիանալի տղա էր, հիասքանչ անձնավորություն: Մի օր պոկերի մրցաշարում կարող էր հաղթել 50 միլիոն դոլար կամ նման մի բան: Բայց ֆուտբոլի խաղադաշտում նա ուղղակի սարսափելի էր: Նա կոպիտ էր խաղում, կոշտ սահանկումներ անում: Շատ վատն էր»,- ասել է Ռոնալդոն:
Բրազիլացին իր հայրենակիցների շրջանում՝ որպես տեխնիկապես ամենաթույլ խաղացողի, անվանել է Ամարալին, որը 1995-96 թվականներին 10 խաղի է մասնակցել Բրազիլիայի հավաքականում:
«Նա շատ էր վազում, բայց եթե 10 գնդակ ստանար, 9-ը կկորցներ»:
Լավագույնների վերաբերյալ Ռոնալդոն կասկած չի ունեցել. «Ռոնալդինյոն՝ Բրազիլիայի հավաքականում, Զիդանը՝ ակումբային մակարդակում: Զիզուն այնքա՜ն ոճ ուներ: Նա տարբերվում էր, չափազանց հմուտ էր և ամեն ինչ հեշտ էր դարձնում»:
