Հիմնանորոգումից և արդիականացումից հետո վերաբացվել է Մհեր Մկրտչյան արտիստական թատրոնը: Հանդիսատեսի առաջ թատրոնն իր դռներն է բացել Եվգենի Շվարցի «Սովորական հրաշք» ներկայացման առաջնախաղով:
Տիգրան Ավինյանը կարևորեց, որ Երևանի բոլոր թատրոնները լինեն արդիական և հանդիսատեսի համար ապահովեն հրաշալի միջավայր: «Կարծում եմ՝ կատարված աշխատանքի արդյունքում մեր մշակութային կյանքն ավելի լավն է դառնում: Չեմ կարող ասել, թե որքան գումար է հատկացվել հիմնանորագմանը, բայց բավական դժվար և տևական գործընթաց է իրականացվել, քանի որ մեր պահանջները բավականին խիստ էին: Մենք բծախնդիր ենք: Ըստ իս՝ դա է ճիշտ մոտեցումը: Ե՛վ հանդիսատեսը, և՛ արտիստները արժանի են լավագույնին»,- նշեց Երևանի քաղաքապետը:
Մհեր Մկրտչյան արտիստական թատրոնի տնօրենի ժամանակավոր պաշտոնակատար Տաթևիկ Մելքոնյան էլ հուսով է, որ վերաբացված թատրոնը քաղաքին նոր գույն է հաղորդելու: «Երբ վստահ ես, որ թատրոնը տեխնիկապես զինված է, ավելի լավ ես քեզ զգում բեմում, չես մտածում այլ հարցերի մասին, երբ դերասանը գիտի, որ լավ և ճիշտ լույս է օգտագործվում, ավելի վստահ է խաղում»,- ասաց Տաթևիկը: Նա նաև տեղեկացրեց, որ թատրոնն ունի հարուստ խաղացանկ: Կան վերականգնված ներկայացումներ, սպասվում են նաև առաջնախաղեր:
Քաղաքապետի խոսքով սա միայն սկիզբն է: Նախատեսում են հիմնանորոգել նաև Պատանի հանդիսատեսի թատրոնը: Աշխատանքներն արդեն մեկնարկել են:
