Տիտանիկի» առաջին դասի ուղևոր, մագնատ Իսիդոր Շտրաուսին պատկանող ոսկե ժամացույցն աճուրդում վաճառվել է ռեկորդային՝ 1.78 միլիոն ֆունտ ստեռլինգով (2.3 միլիոն դոլար), հայտնել է Henry Aldridge & Son աճուրդի տունն իր Instagram-ի էջում: Մեկնարկային գինը կազմել է 1 միլիոն ֆունտ ստեռլինգ, հաղորդում է Daily Mail-ը:

Ժամացույցը կանգ է առել ժամը 2:20-ին՝ այն պահին, երբ նավը խորտակվել է 1912 թվականի ապրիլի 15-ին: Երբ «Տիտանիկը» սկսել է խորտակվել, Շտրաուսը և նրա կինը՝ Աիդան, հրաժարվել են նստել փրկարար նավակ: Նրանց կերպարները պատկերված են ռեժիսոր Ջեյմս Քեմերոնի ֆիլմում, որտեղ տարեց զույգը գրկախառնված պառկած է, երբ նավը խորտակվում է: Հոդվածում ասվում է, որ պատմությունը դարձել է «աղետի մասին ամենահայտնի պատմություններից մեկը»:

Որոնողական խումբը հայտնաբերել է Շտրաուսի մարմինը նրա անձնական իրերի հետ միասին։ Դրանց թվում էր Ժյուլ Յուրգենսենի ժամացույցը՝ «IS» սկզբնատառերով, որը նա ստացել էր որպես նվեր իր 43-ամյակի առթիվ՝ 1888 թվականին։ Իդա Շտրաուսի մարմինը երբեք չի գտնվել։ Ժամացույցը հետագայում վերադարձվել է Շտրաուսի որդուն՝ Ջեսսիին, այլ անձնական իրերի հետ միասին։