Սիրու՞մ եք փազըլներ (puzzle) կամ գլուխկոտրուկներ հավաքել։ Եթե այո, ապա առաջարկում ենք ձեզ փորձել հավաքել ամերիկացի հայտնի նկարիչ Ջեքսոն Պոլլոկի «Կոնվերգենցիա» նկարի հիման վրա ստեղծված գլուխկոտրուկը:
Սա համարվում է աշխարհի ամենաբարդ փազըլը։ Եվ ինչպես վստահեցնում են դժվար խնդիրների սիրահարները` այս գլուխկոտրուկը հավաքելը շատ դժվար է, բայց հնարավոր։
Ջեքսոն Պոլլոկի արվեստի ու նմանատիպ փազըլների երկրպագուները հաստատում են, որ այս 1000 կտորից բակացած, 61×76 սմ չափով կտավը հավաքելու համար նրանցից պահանջվել է մի քանի ամիս։
Ջեքսոն Պոլլոկի «Կոնվերգենցիա» նկարը
Երկրորդ աշխարհամարտից հետո շատ նկարիչներ մերժեցին ավանդական ոճերը, ուղղություններն ու թեմաները և սկսեցին որոնել իրենց ինքնաարտահայտման նոր ձևեր, միջոցներ ու եղանակներ: Դեռևս 1951 թվականին Ջեքսոն Պոլլոկը գրում է.
Ինձ թվում է, որ ժամանակակից նկարիչը չի կարող փոխանցել իր դարաշրջանը, ասենք, օրինակ` ինքնաթիռը, ատոմային ռումբը, ռադիոն Վերածննդի կամ կամ անցյալի ցանկացած այլ մշակույթի հին ձևերի ձևերով: Յուրաքանչյուր սերունդ գտնում է իր սեփական տեխնիկան:
1940-ականների վերջին ամերիկացի նկարիչը մշակեց եզակի ոճ, որն այժմ ճանաչելի է ամբողջ աշխարհում` կաթիլային կերպարվեստ: Նա կտավը փռեց հատակին և հայտարարեց.
Այսպես, ես կարող եմ պտտվել կտավի շուրջ, չորս կողմից աշխատել և բառի բուն իմաստով` հայտնվել կտավում։
Ջեքսոն Պոլլոկի համար կտավի վրա կաթիլների ստեղծումը, ներկի ցպնելը դարձավ պատահականության և հսկողության համադրություն: Նրա տարերային այս կոմպոզիցիաներում տեղ են գտել նաև առօրյա կյանքի մանր մունր դրվագներ։ Բծերի այս խառնուրդի մեջ հնարավոր է գտնել այնպիսի անսպասելի առարկաներ, ինչպիսին են մեխերն ու մետաղադրամները: Օրինակ, «Կոնվերգենցիայի» կենտրոնում կա լուցկի, որը կտավին է փակցված ներկի օգնությամբ։
Պոլլոկը նոր լուծումներ գտնելու նպատակով, սկզբում իր կտավներից շատերը ստեղծել է սև-սպիտակ, այդ թվում նաև «Կոնվերգենցիան»։ Սակայն, չբավարարվելով արդյունքից, նա աշխատանքը փրկելու համար ավելացրել է գույներ։ 1952 թվականին արվեստի քննադատները այդպես էլ չեն եկել ընդհանուր եզրակացության` հաջողվել է նկարը, թե՞ ոչ։ Այնուամենայնիվ, այսօր այս ստեղծագործությունը համարվում է նկարչի գլուխգործոցը։
«Կոնվերգենցիան»` փազըլ կամ գլուկոտրուկ
1964 թվականին Springbok հրատարակչությունը թողարկեց Պոլլոկի «Կոնվերգենցիա» կտավի փազըլը։ Այն ժամանակ դեռ «Աշխարհում ամենադժվար գլուխկոտրուկ» հայտարարված այս խաղը դարձավ սենսացիա և Ամերիկայում վաճառվեց հազարավոր օրինակներով։ Փազըլը բաղկացած էր 340 կտորից, որն այսօրվա դժվար խնդիրների սիրահարների համար բացահայտ քիչ ու հեշտ է համարվում։
Առաջին թողարկումից 40 տարի անց Springbok հրատարակչությունը իր հոբելյանի առթիվ կրկին վերաթողարկեց այս խաղը, սակայն արդեն 1000 մասնիկներից բաղկացած։ Այժմ հրատարակչության կայքում հնարավոր է փազըլը գնել 17-18 դոլարով։ Խաղը գնորդի պակաս չունի։ Կարծիքների բաժնում նմանատիպ խաղերի երկրպագուները միմյանց առաջարկում ու խորհուրդ են տալիս գնել ու լուծել այս գլուխկոտրուկը։ Սակայն, տպավորիչ էր նրանցից մեկը բացատրությունը. «Այս խաղը կարող է խելքահան անել նրանց, ովքեր նախկինում առողջ են եղել, իսկ աննորմալների ուղեղը կարող է վերջնականապես լվանալ։ Սա իր ձևի մեջ յուրօրինակ հաղթանակ-պարտություն է միաժամանակ»։
