Հունվարի 21-ին Արամ Խաչատրյան համերգասրահում կայացավ ՈւՍՈՒՑԻՉԸ մրցանակաբաշխության փակման հանդիսավոր արարողությունը:
Գրան Պրի մրցանակին՝ 1.000.000 ՀՀ դրամ, արժանացավ Աշտարակի Ներսես Աշտարակեցու անվան թիվ 1 հիմնական դպրոցի ուսուցիչ Լիլիթ Ավետիսյանը:
«Ուսուցիչը» մրցանակաբաշխությունը կազմակերպել էր «Ռուսական գրքի տունը Երևանում»՝ «Լիվըր» ընկերության հետ համատեղ: Մրցանակաբաշխության առաքելություն էր՝ բացահայտել տաղանդավոր ուսուցիչներին, նրանց ստեղծագործական և արդյունավետ աշխատանքին աջակցել, խրախուսել և մոտիվացնել. «Ուսուցիչ» մասնագիտության սոցիալական կարգավիճակը բարձրացնել և լավագույն մանկավարժական փորձը տարածել:
«Ուսուցիչը» մրցանակաբաշխությունն անց էր կացվում հետևյալ անվանակարգերում․ «Դեբյուտ», «Երիտասարդ ուսուցիչ», «Վարպետ», «Նորարար», «Ուսուցիչ-կազմակերպիչ», «Ուսուցիչ՝ հավերժ աշակերտ», «Ապրում եմ՝ դպրոցով», «Առաջին ուսուցիչ» , «Իմ ընկեր՝ ուսուցիչ», «Ճակատագրական ուսուցիչ»:
Ներկայացված շուրջ 382 հայտից ժյուրիի անդամները ընտրել էին լավագույններին: «Իհարկե չափազանց բարդ էր ժյուրիի անդամների համար նման քանակի հայտերից ընտրություն կատարելը: Նախատեսում ենք ՝ մրցույթը դարձնել ամենամյա: Մեր հասարակությունում ուսուցչի հեղինակությունը միշտ պետք է բարձր լինի»,-վստահեցրեց «Լիվըր» ընկերության տնօրեն Լուսինե Քարամյանը
Բոլոր անվանակարգերում հաղթող ճանաչված ուսուցիչները ստացան 300.000-ական դրամ, հատուկ մրցանակին՝ ուղևորություն Սանկտ-Պետերբուրգ, արժանացան երկու ուսուցիչ. Գոհար Մելտոնյանը՝ Երևանի Դ.Սարապյանի անվան թիվ 100 հիմնական դպրոցից և Հասմիկ Բիշարյանը՝ Մ. Մաշտոցի անվան երկարօրյա ուսումնական համալիրից:
