Գուստավ Կլիմտի «Ֆրաուլեյն Լիզերի դիմանկարը» կտավը, որն անհետացել էր 1925 թվականին, կրկին հայտնաբերվել է, հայտնում է Bloomberg-ը :
Կտավը ներկայացրել է «Im Kinsky» աճուրդի տունը, որն այն աճուրդի կհանի ապրիլի 24-ին։ Նկարը գնահատվում է 30-50 միլիոն եվրո:
«Աներևակայելի լավ պահպանված է, գրեթե անթերի օրիգինալ վիճակում»,- ասել է «Im Kinsky» աճուրդի տան ժամանակակից արվեստի ղեկավար Կլաուդիա Մյուրտ-Գասերը:
Աճուրդի տունը հայտնել է, որ 1960-ականներից նկարն օրինական գտնվել է ներկայիս սեփականատերերի մոտ: Այն չի ընդգրկվել նացիստական տարիներին օտարումից տուժող արվեստի գործերի ցանկում։
«Ֆրաուլեյն Լիզերի դիմանկարը» Կլիմտի վերջին գործերից էր. նա մահացել է 1918 թվականին: Առաջիկա ամիսների ընթացքում նկարը կցուցադրվի Գերմանիայում, Հոնկոնգում, Շվեյցարիայում և Մեծ Բրիտանիայում:
