1881 թվականի հոկտեմբերի 25-ին Մալագայում է ծնվել իսպանացի նկարիչ, գծանկարիչ, քանդակագործ և կերամիստ Պաբլո Պիկասոն: Նա ասում էր՝ հանգստանում է, երբ աշխատում է, հոգնում՝ պարապությունից և հյուրերից: 91 տարեկանում մահացած նկարիչը վստահ էր՝ կատարելագործվելով յուրաքանչյուր գործում՝ մարդը հասնում է հաջողության։ Պիկասոյի 143-ամյակի կապակցությամբ «Fast News Culture»-ը ներկայացնում է 5 հետաքրքիր փաստ նրա մասին:
Թեև Պաբլո Պիկասոն առավել հայտնի է իր ազգանունով, նրա լրիվ անունը 25 բառ է
Պիկասոյին մկրտել են «Պաբլո Դիեգո Խոսե Ֆրանցիսկո դե Պաուլա Խուան Նեպոմուկենո Կրիսպին Կրիսպինիանո Մարիա դե լոս Ռեմեդիոս դե լա Սանտիսիմա Տրինիդադ Ռուիս Պիկասո» անվամբ։ Նրա անհավանական երկար անունը հարազատների և սրբերի անունների խառնուրդ է: Ռուիզը հոր ազգանունն էր, Պիկասոն՝ մորը։
Պիկասոյի առաջին բառը եղել է «մատիտ»
Պիկասոյի հայրը նկարիչ էր: Սպասվում էր, որ արվեստը կլինի նրա արյան մեջ: Պաբլոյի առաջին բառը իսպաներեն «լապիզն» էր, որն անգլերեն նշանակում է «մատիտ»: Հայրը մասնագիտացած էր թռչունների նատուրալիստական նկարներում: 7 տարեկան էր, երբ հայրը սկսեց սովորեցնել նրան գեղարվեստական գործեր ստեղծել։ Պաբլոյի հայրը որոշեց՝ կհրաժարվի նկարելուց, երբ Պիկասոն դառնա 14 տարեկան: Նա պնդում էր, որ որդին իրենից լավ նկարիչ է դարձել։
Ոստիկանները կարծում էին, որ Պիկասոն գողացել է «Մոնա Լիզան»
1911 թվականին տեղի ունեցավ համաշխարհային արվեստի ամենամեծ սկանդալներից մեկը՝ Լուվրից գողացան «Մոնա Լիզան»: Ոստիկանությունը սկսեց հարցուփորձ անել բնակչությանը: Նրանցից մեկը ուշադրություն հրավիրեց ֆրանսիացի գրող Գիյոմ Ապոլիների վրա: Կասկածում էին, որ Գիյոմը վաճառել է գողացված գործերը: Ապա նույն անձը պնդեց, որ իր լավ ընկեր Պիկասոն է գողացել «Մոնա Լիզան»: Պաբլոն կալանավեց որպես կասկածյալ: Դա Վինչիի գլուխգործոցը հայտնաբերվեց տարիներ անց: Պարզվեց, որ այն գողացել էր Լուվրի անվտանգության նախկին աշխատակիցը:
Պիկասոն ստեղծել է ապշեցուցիչ 150.000 աշխատանք
Ամբողջ աշխարհում նկարչին նվիրված հավաքածուներով և թանգարաններով Պիկասոյի ստեղծագործությունը ընդգրկում է անհավանական 76 տարի և ավելի քան 150.000 տարբեր աշխատանք: Բաժանված լինելով իր կյանքի տարբեր գեղարվեստական փուլերի, ներառյալ կուբիզմը և կապույտ ժամանակաշրջանը, նա աներևակայելի փորձարարական էր և անընդհատ զարգանում էր որպես նկարիչ:
Պիկասոյի վերջին խոսքերը ոգեշնչեցին Փոլ Մաքքարթնիին
91 տարեկանում Պիկասոն Մուգենում (Ֆրանսիայի հարավում գտնվող գյուղ) ընթրիքի ժամանակ ասաց. «Խմի՛ր ինձ համար, խմի՛ր իմ առողջության համար, դու գիտես, որ ես այլևս չեմ կարող խմել»։ Նա մահացել է սրտի կաթվածից։ Նկարիչից ոգեշնչված Փոլ Մաքքարթնին գրեց մի երգ, որը կոչվում է «Պիկասոյի վերջին խոսքերը (խմիր ինձ համար)»:
