Ծուլությունը դեռևս առաջընթացի շարժիչ ուժն է։ 

Ճապոնական տեխնոլոգիական Science Co. Ltd ընկերությունը, որը մասնագիտացած է լոգարանների և խոհանոցների նորարարություններում, հայտարարել է «մարդկանց համար լվացքի մեքենա» արտադրելու պլանների մասին: Այն կներառվի Mirable տեխնիկայի շարքում։

Խոսքը հատուկ խցիկի մասին է, որն առայժմ կոչվում է «Ուսոյարոյի նախագիծ» (Project Usoyaro): Նրա հիմքում նորագույն «նուրբ պղպջակների տեխնոլոգիան» է, ինչպես նաև տարբեր սենսորների և արհեստական ինտելեկտի համակարգը՝ «բարդ լողանալու փորձ» ստեղծելու համար։

Նման ապարատի խնդիրն է՝ ոչ միայն մանրակրկիտ մաքրել մարդու մարմինը, այլև ապահովել տարածք, որտեղ կարելի է լիցքաթափվել հանգստացնող երաժշտության հնչյունների ներքո և մեքենայի ներսում ցուցադրվող տեսանյութով:

Ներսում գտնվող սենսորները կչափեն սիմպատիկ և պարասիմպատիկ նյարդերի վիճակը, իսկ ներկառուցված AI-ն կօգտագործի հավաքած տվյալները՝ ստեղծելու առավել հարմարավետ մթնոլորտ։

Իրականում մարդկային լվացքի մեքենայի հայեցակարգը նոր չէ։ 1970 թվականին Osaka Expo-ում ճապոնական էլեկտրոնիկայի հսկա Sanyo Electric-ը ցուցադրեց իր «Ուլտրաձայնային բաղնիքը», որը լվանում էր, մերսում և չորացնում մարդուն լիովին ավտոմատացված 15 րոպեանոց ցիկլով: Հետո այդ հայեցակարգը կոմերցիոն արտադրանք չդարձավ, բայց հիմա մեկ այլ ճապոնական ընկերություն ցանկանում է վերակենդանացնել այն՝ խոստանալով պատրաստի արտադրանք ներկայացնել մինչև 2025 թվականը։