Ռուսաստանում ամենից շատ կարոտում են IKEA-ն։

Webbankir առցանց ֆինանսական հարթակի վերլուծաբանները պարզել են, թե որ ապրանքանիշերի հեռանալն են ռուսները համարում ամենամեծ կորուստը։ 2022 թվականի օգոստոսի 18-ից սեպտեմբերի 1-ն ընկած ժամանակահատվածում հարցմանը մասնակցել է 1500 մարդ։ Այդ մասին հայտնում է ՏԱՍՍ լրատվական գործակալությունը։

Ամենից շատ Ռուսաստանի Դաշնության քաղաքացիներն ափսոսում են IKEA-ի հեռանալու համար․ հարցվածների 27,2%-ը։ Հաջորդը գալիս է հարավկորեական հսկա Samsung-ը, իսկ լավագույն եռյակը եզրափակում է Adidas-ը։ Ամբողջ ցուցակն այսպիսի տեսք ունի.

• IKEA ― 27,2%;
• Samsung ― 23,8%;
• Adidas ― 17,3%;
• Apple ― 15,8%;
• Coca-Cola — 15,3%;
• H&M — 14,9%;
• Nike — 14,4%;
• McDonald’s — 8,9%.

Բացի այդ, Ռուսաստանի Դաշնության քաղաքացիները ուշադրություն են դարձրել այնպիսի ապրանքների խմբերի սպառվելուն, ինչպիսիք են մեքենաները և ավտոպահեստամասերը (36,8%), դեղերը (28,4%), կենցաղային տեխնիկան, էլեկտրոնիկան (22,3%), անձնական հիգիենայի պարագաները, կենցաղային քիմիկատները, մարտկոցները, սպասքը, հագուստը և կոշիկը (21,9%)։

Չնայած արտասահմանյան ընկերությունների՝ երկիրը լքելուն, ռուսաստանցիների 83%-ն ապրանքների պակաս չի զգում։ Ռուսաստանի Դաշնության քաղաքացիների 77%-ը նշել է, որ շուկայում գտել է բացակայող ապրանքին փոխարինողը հայրենական արտադրողների կողմից: